ამსტერდამის ცენტრალურ მოედანთან, დამდეს მიმდებარე ტერიტორიაზე, დანით ხუთი ადამიანი დაჭრეს. დაშავებულებს შორის არიან ამერიკის შეერთებული შტატების ორი მოქალაქე, პოლონელი მამაკაცი, ბელგიელი ქალბატონი და ჰოლანდიელი ქალი. მათი ასაკი 19-დან 73 წლამდე მერყეობს.
პოლიციის ინფორმაციით, თავდამსხმელი, რომელიც მამაკაცია, ადგილზე მყოფთა დახმარებით დააკავეს. დაკავებულს ფეხზე დაზიანება აღენიშნება და ამჟამად საავადმყოფოში იმყოფება.
პოლიცია ამ დრომდე იძიებს თავდასხმის მოტივს, თუმცა არ გამორიცხავენ, რომ თავდამსხმელმა მსხვერპლი შემთხვევითი შერჩევის პრინციპით აირჩია.
ამსტერდამის მერის, ფემკე ჰალსემას განცხადებით, პოლიციის გამოძიება აქტიურად მიმდინარეობს და ხელისუფლება იმედოვნებს, რომ მომხდარის შესახებ მეტ დეტალს უახლოეს მომავალში გაარკვევს. მან ასევე აღნიშნა, რომ თანაუგრძნობს დაზარალებულებს, მათ ოჯახებსა და ახლობლებს.
ცნობილია დაშავებულთა ასაკი და ეროვნება: 67 წლის ქალი და 69 წლის მამაკაცი ამერიკის შეერთებული შტატებიდან, 26 წლის მამაკაცი პოლონეთიდან, 73 წლის ქალბატონი ბელგიიდან და 19 წლის ქალი ამსტერდამიდან.
ადგილობრივი დროით 15:30 საათისთვის საგანგებო სამსახურებში შევიდა შეტყობინება დანით თავდასხმის შესახებ. პოლიციის თანამშრომლები ოპერატიულად მივიდნენ შემთხვევის ადგილზე და ქალაქის ცენტრში, სინტ ნიკოლასსტრაატის მიმდებარე ტერიტორიაზე, ხუთი დაჭრილი აღმოაჩინეს.
სამართალდამცავებმა, ადგილობრივების დახმარებით, თავდამსხმელის დაკავება ინციდენტიდან მალევე შეძლეს.
ხელისუფლებამ სამეფო სასახლის მიმდებარე ტერიტორია, დამდეს მოედანზე, სადაც სასწრაფო დახმარების ვერტმფრენი დაეშვა, გადაკეტა. ეს მოედანი ქალაქის ისტორიულ ცენტრში მდებარეობს და ტურისტებში დიდი პოპულარობით სარგებლობს.
ადგილობრივი გაზეთის, "დე ტელეგრააფის" ინფორმაციით, ერთ-ერთმა თვითმხილველმა განაცხადა, რომ მოულოდნელად "ყინულივით ცივი კივილი" გაიგონა, რასაც პანიკა მოჰყვა. მაღაზიის გამყიდველმა ასევე აღნიშნა, რომ ხმამაღალი ყვირილი და შეძახილები გაიგონა და ხალხმა სირბილი დაიწყო.
ამსტერდამული გამოცემა "ჰეტ პაროლი" ციტირებს თვითმხილველს, რომელმაც თქვა, რომ ხმაურის გაგების შემდეგ გოგონას მიუახლოვდა და დაინახა, რომ დანა ზურგში, ბეჭებს შორის ჰქონდა ჩარჭობილი, როდესაც ვიღაცამ სასწრაფო დახმარების გამოძახება დაიყვირა.
პოლიცია მოუწოდებს ყველას, ვისაც ინციდენტის ამსახველი ფოტო ან ვიდეო მასალა გააჩნია, ატვირთონ ის მტკიცებულების სახით.
თავდაპირველად გავრცელდა ინფორმაცია ოთხი დაშავებულის შესახებ, თუმცა მოგვიანებით პოლიციამ განაცხადა, რომ ხუთი ადამიანი და თავდამსხმელი დაშავდა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს