აშშ-ის სასამართლომ ტრამპს ვენესუელელების მასობრივი დეპორტაციისთვის საომარი დროის კანონის გამოყენება აუკრძალა

ფედერალურმა მოსამართლემ დონალდ ტრამპს ვენესუელელების მასობრივი დეპორტაციის განხორციელება 227 წლის წინანდელი კანონის საფუძველზე აუკრძალა. ეს კანონი, რომელიც 1798 წელს არის მიღებული, მიზნად ისახავს აშშ-ის დაცვას საომარი მოქმედებების დროს.

შაბათს, ტრამპმა განაცხადა, რომ ვენესუელური კრიმინალური დაჯგუფება "ტრენ დე არაგუას" წევრები "არარეგულარულ ომს" აწარმოებენ აშშ-ის წინააღმდეგ და მათ დეპორტაციას "უცხოელი მტრების შესახებ" 1798 წლის კანონის საფუძველზე განახორციელებდა.

თუმცა, აშშ-ის საოლქო მოსამართლე ჯეიმს ბოასბერგმა შაბათს საღამოს გამოსცა ბრძანება, რომელიც დროებით, 14 დღის განმავლობაში აჩერებს აღნიშნული განკარგულებით გათვალისწინებულ დეპორტაციებს.

როგორც "ვაშინგტონ პოსტი" იუწყება, მოსამართლე ბოასბერგმა განაცხადა, რომ მან შეიტყო დეპორტირებული პირებით დატვირთული თვითმფრინავების აფრენის შესახებ და მათ უკან დაბრუნების ბრძანება გასცა.

აღნიშნული კანონი აშშ-ს საომარი მოქმედებების დროს უფლებას აძლევს დააკავოს და გააძევოს ქვეყნის უსაფრთხოებისთვის საშიში პირები სათანადო სამართლებრივი პროცედურების დაცვის გარეშე. ის უკანასკნელად მეორე მსოფლიო ომის დროს გამოიყენეს იაპონური წარმოშობის პირების ინტერნირებისთვის.

ტრამპის შაბათის განცხადება, რომელშიც "ტრენ დე არაგუა" აშშ-ის ტერიტორიაზე "შემოსევას ან მტაცებლურ შემოჭრას ახორციელებს, ცდილობს ან ემუქრება", მოულოდნელი არ ყოფილა. მან გასული წლის საარჩევნო კამპანიის დროსაც დაჰპირდა ამ საკამათო კანონის მასობრივი დეპორტაციებისთვის გამოყენებას.

ამერიკის სამოქალაქო თავისუფლებათა კავშირმა და სხვა უფლებადამცველმა ჯგუფებმა სარჩელი შეიტანეს მისი გამოყენების აღსაკვეთად ჯერ კიდევ განკარგულების გამოცემამდე.

მოსამართლემ განაცხადა, რომ კანონში გამოყენებული ტერმინები "შემოსევა" და "მტაცებლური შემოჭრა" "რეალურად მტრული სახელმწიფოების მიერ განხორციელებულ მტრულ ქმედებებს უკავშირდება" და კანონი, სავარაუდოდ, არ წარმოადგენს ტრამპის განკარგულების კარგ საფუძველს.

ამერიკის სამოქალაქო თავისუფლებათა კავშირის იურისტმა განაცხადა, რომ მისი ინფორმაციით, კვირას ჰაერში ვენესუელელი ემიგრანტებით დატვირთული ორი თვითმფრინავი იმყოფებოდა.

საქმე სასამართლო სისტემაში გაგრძელდება და შესაძლოა უზენაეს სასამართლომდეც მიაღწიოს.

აღნიშნული განკარგულება და მის გარშემო ატეხილი აჟიოტაჟი, სავარაუდოდ, გააერთიანებს ტრამპის მხარდამჭერებს, რომლებმაც ის თეთრ სახლში არალეგალური იმიგრაციის წინააღმდეგ ბრძოლისა და ყოველდღიური მოხმარების საქონლის ფასების შემცირების დაპირებებით დააბრუნეს. იანვარში ინაუგურაციის შემდეგ, მან სწრაფად დაიწყო აშშ-ის საიმიგრაციო სისტემის შეცვლა.

უფლებადამცველი ჯგუფები და ზოგიერთი იურიდიული ექსპერტი ამ კანონის გამოყენებას უპრეცედენტოს უწოდებენ და აღნიშნავენ, რომ "უცხოელი მტრების შესახებ" კანონი წარსულში მხოლოდ იმ შემთხვევაში გამოიყენებოდა, როდესაც აშშ ოფიციალურად აცხადებდა ომს სხვა ქვეყნების წინააღმდეგ. კონსტიტუციის თანახმად, ომის გამოცხადება მხოლოდ კონგრესს შეუძლია.

ტრამპის ბრძანების თანახმად, ყველა ვენესუელელი მოქალაქე, რომელიც იმყოფება აშშ-ში, არის 14 წლის ან მეტის, არის "ტრენ დე არაგუას" წევრი და "არ არის ნატურალიზებული ან კანონიერი მუდმივი რეზიდენტი", უნდა იყოს "დაკავებული, შეზღუდული, დაცული და გაძევებული, როგორც უცხოელი მტრები".

ტრამპს განკარგულებაში არ განუმარტავს, თუ როგორ დაადგენენ აშშ-ის ოფიციალური პირები, რომ პირი ძალადობრივი, ტრანსნაციონალური დაჯგუფების წევრია.

კანონის ამ ფორმით გამოყენებით, იმის ნაცვლად, რომ გამოეყენებინა საიმიგრაციო კანონები, რომლებიც მას უკვე აძლევს "საკმარის უფლებამოსილებას" დაჯგუფების წევრების დეპორტაციისთვის, ტრამპს არ მოუწევს იმის დამტკიცება, რომ დაკავებულები "ტრენ დე არაგუას" ნაწილი არიან.

მისი მიზანია, თავიდან აიცილოს რაიმე მტკიცებულების წარმოდგენის ან მოსამართლის დარწმუნების აუცილებლობა, რომ ვინმე ნამდვილად არის დაჯგუფების წევრი, სანამ მათ დეპორტაციას განახორციელებს. ამ ძალაუფლების გამოყენების ერთადერთი მიზეზი არის ვენესუელელების ფართომასშტაბიანი დაკავებებისა და დეპორტაციების განხორციელების მცდელობა მათი წარმოშობის საფუძველზე და არა რაიმე დაჯგუფების საქმიანობის საფუძველზე, რომლის დამტკიცებაც საიმიგრაციო პროცედურების ფარგლებში იქნებოდა შესაძლებელი.