აშშ-ში საცალო ვაჭრობის მოცულობა მარტში შემცირდა

შეერთებულ შტატებში საცალო ვაჭრობის მაჩვენებლები მარტში შემცირდა, რაც მომხმარებელთა მხრიდან ხარჯების შემცირებით არის განპირობებული. ეკონომიკური ანალიტიკოსები ამ ტენდენციას საბანკო სექტორში არსებულ კრიზისთან და რეცესიის მოლოდინთან აკავშირებენ.

კომერციის დეპარტამენტის მონაცემებით, მარტში საცალო გაყიდვების მოცულობა, სეზონური ფაქტორის გათვალისწინებით, თუმცა ინფლაციის გარეშე, წინა თვესთან შედარებით 1%-ით შემცირდა. ეს მაჩვენებელი მოსალოდნელზე უფრო მაღალია, რადგან პროგნოზი 0.4%-იან კლებას ითვალისწინებდა.

ანალიტიკოსები ამ ვარდნის ერთ-ერთ მიზეზად საგადასახადო დაბრუნების შემცირებულ მოცულობას ასახელებენ. აღინიშნა, რომ მიმდინარე წლის მარტში, შიდა შემოსავლების სამსახურმა (IRS) 84 მილიარდი დოლარის გადასახადი დააბრუნა, რაც 2022 წლის ანალოგიურ პერიოდთან შედარებით 25 მილიარდი დოლარით ნაკლებია.

შედეგად, მომხმარებლებმა შეამცირეს ხარჯები უნივერსალურ მაღაზიებში, ასევე ხანგრძლივი მოხმარების საგნებზე, როგორიცაა საყოფაცხოვრებო ტექნიკა და ავეჯი. ზოგადი დანიშნულების მაღაზიებში ხარჯები მარტში 3%-ით შემცირდა, ხოლო ბენზინგასამართ სადგურებზე - 5.5%-ით. ბენზინგასამართი სადგურების გაყიდვების გამოკლებით, საცალო ვაჭრობის მოცულობა თებერვალთან შედარებით 0.6%-ით შემცირდა.

მიუხედავად ამისა, საცალო ვაჭრობა წინა წელთან შედარებით 2.9%-ით გაიზარდა. ექსპერტები ვარაუდობენ, რომ საგადასახადო დაბრუნების შემცირებამ და კვების დახმარების პროგრამების შეწყვეტამ მნიშვნელოვანი როლი ითამაშა საცალო ვაჭრობის შემცირებაში.

გარდა ამისა, აღინიშნა, რომ საკრედიტო და სადებეტო ბარათებით გადახდების ზრდამ მნიშვნელოვნად იკლო, რაც შესაძლოა, ხელფასების ზრდის შენელებასთან იყოს დაკავშირებული.

მიუხედავად იმისა, რომ შრომის ბაზარი კვლავ სტაბილურია, ბოლო პერიოდში გარკვეული შენელება შეინიშნება. მარტში დამსაქმებლებმა 236,000 ახალი სამუშაო ადგილი შექმნეს, რაც ისტორიულად მაღალი მაჩვენებელია, თუმცა წინა ექვსი თვის საშუალო მაჩვენებელზე ნაკლებია.

ფედერალური რეზერვის წარმომადგენლები ვარაუდობენ, რომ წლის ბოლოსთვის აშშ-ის ეკონომიკა რეცესიის ფაზაში შევა, რაც საპროცენტო განაკვეთების ზრდის შედეგი იქნება.