2021 წელს, თალიბანის მიერ ავღანეთის ხელში ჩაგდების შემდეგ, ავღანელი ქალების კრიკეტის ნაკრების წევრები სასიკვდილო საფრთხის წინაშე აღმოჩნდნენ. სპორტსმენებისთვის, რომელთაც თავიანთი ქვეყნის სახელით ასპარეზობა სურდათ, სიტუაცია კრიტიკული გახდა. ყოფილი ავსტრალიელი კრიკეტის მოთამაშე, მელ ჯონსი, სხვა ქალებთან ერთად, საიდუმლოდ ხელმძღვანელობდა ოპერაციას, რომლის მიზანიც ავღანელი ქალების უსაფრთხოდ გაყვანა იყო ქვეყნიდან.
ფიროზა ამირი, ნაკრების ერთ-ერთი მოთამაშე, იხსენებს, რომ ყოველ ჯერზე, როდესაც მათ მანქანას საგუშაგოებზე აჩერებდნენ, შიშისგან კანკალებდა. წარმოუდგენელია, როგორ დაიჯერეს თალიბანის მებრძოლებმა მათი ახსნა-განმარტებები, თითქოს ოჯახურ ქორწილში მიდიოდნენ ან დედა პაკისტანში სამკურნალოდ გადაჰყავდათ.
სამი წლის შემდეგ, ფიროზა და მისი თანაგუნდელები მელბურნში, მოედანზე გავიდნენ, რათა ავღანეთის ქალთა ნაკრების სახელით პირველი მატჩი ჩაეტარებინათ. ეს იყო მათი განსაკუთრებული ისტორიის ახალი თავი. მელ ჯონსი, რომელიც ამ მოვლენას ემოციურად ადევნებდა თვალს, იყო ის ადამიანი, რომელმაც მოაწყო "უკანა ეზოს საიმიგრაციო სამსახური", რათა მოეპოვებინა ჰუმანიტარული ვიზები, ფული და უსაფრთხო გადაადგილება მოთამაშეებისთვის და მათი ოჯახებისთვის.
მიუხედავად იმისა, რომ ეს დღე უდიდესი სიხარულის მომტანი იყო მოთამაშეებისთვის, რომლებმაც საბოლოოდ შეძლეს საყვარელ სპორტში დაბრუნება, მათ ფორმაზე გამოსახული სპეციალური ლოგო, ოფიციალური გერბის ნაცვლად, მუდმივად ახსენებდა, რომ ბრძოლა თამაშის უფლებისთვის ჯერ კიდევ შორს არის დასრულებამდე, რადგან საერთაშორისო კრიკეტის საბჭო (ICC) მათ ეროვნულ ნაკრებად არ აღიარებს.
ახალ დოკუმენტურ ფილმში "კრიკეტის მივიწყებული გუნდი", BBC იკვლევს გუნდის ისტორიას მოთამაშეებთან და მათთან საუბრით, ვინც გადამწყვეტი როლი ითამაშა მათ უსაფრთხო ევაკუაციაში.
ფიროზა იხსენებს, რომ 2021 წლის აგვისტოში, როდესაც შეიტყო თალიბანის დაბრუნების შესახებ, შოკში ჩავარდა და იგრძნო, რომ ყველაფერს კარგავდა. მან იცოდა, რომ გუნდს სასწრაფოდ უნდა დაეტოვებინა ქვეყანა. მისი მშობლები თალიბანის პირველი მმართველობის დროს ცხოვრობდნენ ავღანეთში და იცოდნენ, რა მოუვიდოდათ გოგონებს. ფიროზამ არ იცოდა, გადარჩებოდა თუ არა, ექნებოდა თუ არა მას და მის ოჯახს ავღანეთიდან გასვლის შანსი. მან დაწვა ყველა თავისი სერტიფიკატი და მედალი.
თალიბანის კანონების თანახმად, ქალებს ეკრძალებათ უნივერსიტეტებში, სპორტში და პარკებში სიარული. ასევე აკრძალულია მათი ხმის გაგონება სახლის გარეთ.
ნაკრების კიდევ ერთი წევრი, ნაჰიდა საპანი იხსენებს, როგორ მივიდნენ თალიბები მის სახლში მის მოსაძებნად. მისმა ძმამ უთხრა მათ, რომ არ იცნობდა კრიკეტის მოთამაშე გოგონას, მაგრამ ნაჰიდას ჰქონდა თანაგუნდელების სია, რომელიც სასწრაფოდ გაანადგურა. ნაჰიდას ოჯახმა, რომლის ძმაც წინა მთავრობაში მუშაობდა, თალიბანისგან მუქარის შემცველი ზარები და შეტყობინებები მიიღო.
ათასობით კილომეტრის მოშორებით, მელ ჯონსი, კოვიდ-19-ის პანდემიის დროს, ავსტრალიის ერთ-ერთ სასტუმროში კარანტინში იჯდა, როდესაც ინდოელი ჟურნალისტისგან შეტყობინება მიიღო ავღანელი კრიკეტის გუნდის მდგომარეობის შესახებ. მოთამაშეებმა დახმარებისთვის ავღანეთის კრიკეტის საბჭოს (ACB) მიმართეს.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს