ავსტრალიის რაგბის ნაკრების ყოფილ კაპიტანს პატიმრობა მიესაჯა

ავსტრალიის რაგბის კავშირის ნაკრების ყოფილ კაპიტანს, როკი ელზომს, საფრანგეთის სასამართლომ ორი წლით თავისუფლების აღკვეთა მიუსაჯა. მიზეზი საფრანგეთის სარაგბო კლუბ "ნარბონის" პრეზიდენტობის დროს კორპორატიული აქტივების არასათანადო გამოყენება გახდა. 42 წლის ელზომს, რომელმაც ავსტრალიის ნაკრებში 75 მატჩი ჩაატარა, ასევე დაეკისრა 100,000 ევროს ოდენობის ჯარიმა, რომლის ნახევარი პირობითია. სასამართლომ მის დასაკავებლად საერთაშორისო ორდერი გასცა, ვინაიდან მისი ადგილსამყოფელი ამჟამად უცნობია. ელზომი, რომელიც 2015-2016 წლებში ხელმძღვანელობდა "ნარბონს", წარსულში ბრალდებებს უარყოფდა. 2024 წლის ოქტომბერში მას ხუთი წლით პატიმრობა მიესაჯა, თუმცა აპელაციის შემდეგ საქმე ხელახლა განიხილეს. 2024 წლის ოქტომბრის სასამართლო პროცესზე, რომელსაც ის ასევე არ ესწრებოდა, ელზომი დამნაშავედ ცნეს დოკუმენტების გაყალბებაში, გაყალბებული დოკუმენტების გამოყენებასა და კორპორატიული აქტივების ბოროტად გამოყენებაში. 2025 წლის სასამართლო პროცესზე გაყალბების ბრალდებები მოხსნეს, თუმცა ყოფილმა სპორტსმენმა კლუბის ლიკვიდატორისთვის 219,760 ევროს ოდენობის კომპენსაცია უნდა გადაიხადოს. პროკურორი ელზომისთვის სამი წლით თავისუფლების აღკვეთას და 630,000 ევროს ჯარიმას ითხოვდა. "ნარბონმა" საფრანგეთის სარაგბო ჩემპიონატი ორჯერ მოიგო და სამჯერ მეორე ადგილი დაიკავა. თუმცა, კლუბი 2018 წელს გაკოტრდა და ამჟამად მესამე დივიზიონში ასპარეზობს. ფლანკერმა ელზომმა ავსტრალიის ნაკრების კაპიტნის პოსტი 2009 წლიდან 2011 წლამდე ეკავა, ხოლო დებიუტი 2005 წელს ჰქონდა. მან ასევე მოიპოვა მატჩის საუკეთესო მოთამაშის წოდება, როდესაც დაეხმარა დუბლინურ კლუბ "ლენსტერს" 2009 წელს ჰეინეკენის თასის მოგებაში ირლანდიელ ვარსკვლავებთან, ჯონი სექსტონთან და ბრაიან ო'დრისკოლთან ერთად. ელზომი 2024 წლის აგვისტოდან ირლანდიაში ცხოვრობდა, მაგრამ ქვეყანა გასულ წელს მის წინააღმდეგ დაკავების ორდერის გაცემის შემდეგ დატოვა.