ბრიტანული მაუწყებლობის კორპორაცია (BBC) მაყურებელს შესთავაზებს შოტლანდიის, უელსისა და ჩრდილოეთ ირლანდიის ეროვნული საფეხბურთო ნაკრებების მონაწილეობით მსოფლიო ჩემპიონატის საკვალიფიკაციო ეტაპის ყველა მატჩის პირდაპირ ეთერში ხილვის შესაძლებლობას.
უეფასთან ახლად დადებული შეთანხმების თანახმად, ტელევიზიით სულ 41 პირდაპირი რეპორტაჟი გადაიცემა. აღნიშნული შეთანხმება ასევე მოიცავს ამ გუნდების ამხანაგურ შეხვედრებს და შოტლანდიის ნაკრების ერთა ლიგის პლეი-ოფის მატჩს საბერძნეთის წინააღმდეგ, რომელიც მიმდინარე თვის ბოლოს გაიმართება.
2026 წლის მსოფლიო ჩემპიონატზე, რომელიც ამერიკის შეერთებულ შტატებში, კანადასა და მექსიკაში ჩატარდება, 48 გუნდი მიიღებს მონაწილეობას. შოტლანდიის ნაკრები მსოფლიო ჩემპიონატის ფინალურ ეტაპზე ბოლოს 1998 წელს იასპარეზა, ჩრდილოეთ ირლანდიის ნაკრები კი - 1986 წელს. უელსმა კი 64-წლიანი პაუზის შემდეგ, 2022 წელს ყატარში გამართულ მსოფლიო ჩემპიონატზე ითამაშა.
აღნიშნული შეთანხმება უზრუნველყოფს, რომ დიდი ბრიტანეთის ოთხივე ნაკრების მსოფლიო ჩემპიონატის საკვალიფიკაციო მატჩები უფასო სატელევიზიო არხებით გადაიცემა. ინგლისის ნაკრების მატჩებს კი ITV აჩვენებს.
BBC Nations-ის დირექტორმა, როდრი ტალფან დევისმა განაცხადა, რომ იგი მოხარულია, რომ შოტლანდიის, უელსისა და ჩრდილოეთ ირლანდიის გულშემატკივრებს შესაძლებლობა ექნებათ, ისიამოვნონ საერთაშორისო საფეხბურთო მატჩების პირდაპირი და უფასო ტრანსლაციებით. მისი თქმით, ცოცხალი საერთაშორისო სპორტი ყველაზე მეტად აღვიძებს წარმოსახვას, განსაკუთრებით კი მსოფლიოს უდიდეს ტურნირზე კვალიფიკაციის მოპოვებისათვის ბრძოლა.
მატჩების ჩვენება მოხდება BBC One-ის არხებით თითოეულ ქვეყანაში და BBC iPlayer-ის საშუალებით. საკვანძო შეხვედრები ასევე გადაიცემა დიდი ბრიტანეთის მასშტაბით ქსელურ ტელევიზიაში. პირდაპირი რეპორტაჟები დაემატება BBC Radio Wales-ის, BBC Radio Ulster-ის, BBC Radio Scotland-ის, BBC Radio Cymru-სა და BBC Sport-ის აპლიკაციის არსებულ საერთაშორისო გაშუქებას.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს