ფორმულა 1-ის ყოფილმა ხელმძღვანელმა, ბერნი ეკლსტოუნმა, საკუთარი ისტორიული ავტომობილების კოლექცია Red Bull-ის მემკვიდრეს, მარკ მატეშიცს, მსოფლიო რეკორდულ ფასად მიჰყიდა. 94 წლის ეკლსტოუნმა 2024 წლის ბოლოს განაცხადა, რომ 69 ავტომობილისგან შემდგარ კოლექციას გაყიდდა.
კოლექციაში შედის ისეთი ლეგენდარული ავტომობილები, როგორებიცაა ფორმულა 1-ის მსოფლიო ჩემპიონების, ნიკი ლაუდას, მაიკ ჰოთორნისა და მიხაელ შუმახერის მიერ ნარბოლიდი ფერარები, კარლოს პაჩეს, ლაუდასა და ნელსონ პიკეს მიერ ნარბოლიდი ბრაბჰემები და ასევე ბრაბჰემ-ალფა რომეო, რომელიც მხოლოდ ერთხელ გამოიყენეს რბოლაში.
მიუხედავად სუვერენული ფონდების მხრიდან დიდი ინტერესისა, ეკლსტოუნის კოლექცია Red Bull-ის დამფუძნებლის, დიტრიხ მატეშიცის ვაჟმა, მილიარდერმა მარკ მატეშიცმა შეიძინა, რომელმაც პირობა დადო, რომ კოლექციას საზოგადოებისთვის ხელმისაწვდომს გახდის.
მიუხედავად იმისა, რომ მატეშიცის მიერ გადახდილი თანხის ოდენობა არ სახელდება, გამყიდველმა ტომ ჰარტლი უმცროსმა განაცხადა, რომ ეს იყო "ავტომობილების კოლექციონირების სამყაროში ოდესმე დადებული უდიდესი ერთჯერადი გარიგება და თანაც რამდენჯერმე". გავრცელებული ინფორმაციით, კოლექციის ღირებულება დაახლოებით 500 მილიონი ფუნტი სტერლინგია.
ეკლსტოუნმა განაცხადა, რომ მოხარულია, რომ ავტომობილები კარგ ხელში გადავიდა და რომ ისინი მუზეუმში გამოიფინება, რათა ხალხს მათი ნახვის შესაძლებლობა ჰქონდეს. მატეშიცმა აღნიშნა, რომ ისტორიულად მნიშვნელოვანი კოლექციის მოვლა-პატრონობას და გაფართოებას აპირებს და უახლოეს მომავალში შესაბამის ადგილას საზოგადოებისთვის ხელმისაწვდომს გახდის.
ცნობისთვის, 2023 წელს ეკლსტოუნი თაღლითობის ბრალდებით დათანხმდა საგადასახადო სამსახურისთვის დაახლოებით 653 მილიონი ფუნტი სტერლინგის გადახდას. მან განმარტა, რომ კოლექციის გაყიდვის გადაწყვეტილება იმით იყო განპირობებული, რომ არ სურდა მისი გარდაცვალების შემდეგ ამ საკითხის მოგვარება მის მეუღლეს, ფაბიანას, დაეტოვებინა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს