ბიძინა ივანიშვილი: ადგილობრივი გმირი თუ რუსეთის მოკავშირე? მილიარდერი, რომელიც ქართველებს ყოფს

ჩრდილო-დასავლეთ საქართველოში მდებარე სოფელ ჭორვილაში, მოსახლეობის უმეტესობა აღმერთებს ბიძინა ივანიშვილს, მათ სახელოვან თანასოფლელს, რომელსაც ბევრი ქვეყნის რეალურ მმართველად მიიჩნევს. ეს არის თვალწარმტაცი დასახლება, სადაც გზები კარგ მდგომარეობაშია, სახლები მოვლილია და მრავლადაა მმართველი პარტია "ქართული ოცნების" ლურჯი და ყვითელი დროშები.

ადგილობრივი მაცხოვრებელი, მამია მაჭავარიანი, ახლომდებარე ტყიდან სოფელს ათვალიერებს და ამბობს: "ეს ყველაფერი, რასაც ხედავთ - ახალი სახლები და გზები - ჩვენი კაცის გაკეთებულია. მის გარეშე არაფერი იქნებოდა და მან ყველაფერი გააკეთა ჩვენთვის".

ივანიშვილმა დააარსა "ქართული ოცნება" და პარტია უკვე 12 წელია ხელისუფლებაშია. ოთხ თვეზე მეტია, რაც საქართველოს მოქალაქეები ქუჩებში გამოდიან და ივანიშვილის პარტიას გასული ოქტომბრის არჩევნების გაყალბებაში ადანაშაულებენ. ასევე, "ქართულ ოცნებას" აკრიტიკებენ ევროკავშირისკენ მიმავალი ქვეყნის კურსიდან გადახვევისა და რუსეთის გავლენის სფეროში დაბრუნების მცდელობისთვის.

"ქართული ოცნება" ამ ბრალდებებს უარყოფს და ჭორვილაში ვერ იპოვით ვერავის, ვინც მათ მილიარდერ თანასოფლელზე ცუდს იტყვის. ივანიშვილმა ქონება რუსეთში, 1990-იან წლებში, საბჭოთა კავშირის დაშლის შემდეგ დააგროვა. თავდაპირველად კომპიუტერებს ყიდდა, შემდეგ კი ბანკებსა და მეტალურგიულ აქტივებს დაეუფლა. საქართველოში 2003 წელს დაბრუნდა.

თემურ კაპანაძის თქმით, რომელიც ჭორვილის სკოლაში ისტორიას ასწავლის (სადაც ივანიშვილი სწავლობდა ბავშვობაში), ყველა ახალდაქორწინებული წყვილი ივანიშვილისგან 3000 დოლარის ოდენობის საჩუქარს იღებს. სოფლის სკოლას, საქართველოს სოფლების უმეტესი სკოლებისგან განსხვავებით, საკუთარი საცურაო აუზი და დახურული საკალათბურთო მოედანი აქვს.

"მან საავადმყოფო აღადგინა, ორი ეკლესია ააშენა, ყველა გზა გააკეთა, მთელ რეგიონში სახურავები შეაკეთა", - ამბობს თემური. "პირადად მე მივიღე მაცივარი, ტელევიზორი, გაზქურა და ბატონი ბიძინა ხუთი წლის განმავლობაში გვეხმარებოდა ყოველთვიურად 200 ლარის გადახდით".

აქ ოპოზიციას პროევროპული ანტისამთავრობო პროტესტების ორგანიზებაში ადანაშაულებენ და ახალგაზრდებს მათ "იარაღად" მოიხსენიებენ. "ჩვენც გვინდა ევროპა, მაგრამ ჩვენი ტრადიციებით და ეს არის ის, რაც მთავრობასაც სურს", - ამბობს ადგილობრივი მცხოვრები, გიორგი ბურჯენიძე. "ჩვენ ქრისტიანული ქვეყანა ვართ და ჩვენი ტრადიციები ნიშნავს, რომ კაცები უნდა იყვნენ კაცები და ქალები უნდა იყვნენ ქალები. პრეზიდენტი ტრამპიც ჩვენსავით ფიქრობს".

მოსაზრება, რომ ევროპა ცდილობს ქართული ტრადიციებისთვის უცხო ღირებულებების, მაგალითად, გეი უფლებების თავს მოხვევას, ხშირად მეორდება სახელმწიფო მინისტრებისა და პროსამთავრობო მედიის მიერ. ისინი ასევე უგულებელყოფენ ყოველდღიურ პროტესტებს, რომლებიც "ქართული ოცნების" მიერ ევროკავშირთან ქვეყნის მომავალი წევრობის შესახებ მოლაპარაკებების შეჩერებამ გამოიწვია.

"ცეცხლი ოლიგარქიას!" - ეს არის ერთ-ერთი მთავარი ლოზუნგი მიმდინარე პროტესტებზე, რომელიც ბიძინა ივანიშვილის გადაჭარბებულ გავლენას ეხება ქვეყნის პოლიტიკაზე. "საქართველოს ამჟამად მართავს ოლიგარქი, რომელსაც ძალიან რუსული დღის წესრიგი აქვს", - ამბობს თამარ არველაძე, 26 წლის, რომელიც თითქმის ყოველდღე უერთდება პროტესტებს დედაქალაქ თბილისში, რათა ებრძოლოს ივანიშვილის გადაჭარბებულ გავლენას. "ის ფლობს ყველაფერს, ყველა ინსტიტუტსა და სამთავრობო ძალებსა და რესურსებს. ის ამ ქვეყანას თავის პირად საკუთრებად აღიქვამს და მართავს მას, როგორც საკუთარ ბიზნესს".

გასულ თვეში თამარი და მისი მეგობარი ბიჭი ინციდენტში მოხვდნენ, რომელიც მობილურ ტელეფონებზე დაფიქსირდა და ვირუსულად გავრცელდა. ისინი პროტესტის ადგილისკენ მიემართებოდნენ მანქანით და შეძახეს "ცეცხლი ოლიგარქიას!", როდესაც ნიღბიანმა პოლიციელებმა მანქანა გარს შემოარტყეს და შეღწევა სცადეს. "ეს წამებში მოხდა, მაგრამ საათებივით გაგრძელდა. შოკირებული ვიყავი, რამდენად აგრესიულად ცდილობდნენ ამის გაკეთებას. მანქანიდან რომ გამოვეყვანეთ, არ ვიცი რა მოხდებოდა".

თამარის მეგობარ ბიჭს მართვის მოწმობა ერთი წლით ჩამოართვეს და პოლიციისთვის გინების გამო შესაძლოა პატიმრობაც შეეფარდოს. თამარი კი 3600 დოლარით დააჯარიმეს, რაც უზარმაზარი თანხაა საქართველოში, სადაც საშუალო თვიური ხელფასი 500 დოლარს უახლოვდება. საერთაშორისო დამკვირვებლების მიერ გაკრიტიკებული სადავო საპარლამენტო არჩევნების შემდეგ, ქართული ოპოზიცია პარლამენტს ბოიკოტს უცხადებს, რაც მმართველ "ქართულ ოცნებას" საშუალებას აძლევს...