ბრიტანეთის საცხენოსნო ხელისუფლება (BHA) ახალი ინიციატივის ფარგლებში, სარბოლო ცხენებს გენეტიკურ დოპინგზე შეამოწმებს. ანტიდოპინგური პროგრამის გაფართოება განხორციელდება მას შემდეგ, რაც BHA-მ თითქმის 2 მილიონი ფუნტი სტერლინგი გამოყო შესაბამისი დეტექციის მეთოდების კვლევისთვის.
მიუხედავად იმისა, რომ ამ დროისთვის არ არსებობს მტკიცებულება, რომ გენეტიკური დოპინგი საცხენოსნო სპორტში გამოიყენებოდა, BHA მიზნად ისახავს თავიდან აიცილოს მომავალი კორუფციული რისკები. გენეტიკური დოპინგი გულისხმობს დნმ-ის გენეტიკურ ან უჯრედულ მანიპულირებას, გენური რედაქტირების ან გადაცემის ტექნიკის გამოყენებით, სპორტული შედეგების გაუმჯობესების ან ვარჯიშის შემდგომი აღდგენის ხელშეწყობის მიზნით.
BHA მხარს უჭერდა სამეცნიერო კვლევებს LGC ლაბორატორიაში, რომელიც მდებარეობს ნიუმარკეტის მახლობლად, ფორდჰემში. კვლევებში მონაწილეობდა ცხენების შესწავლის ცენტრიც. ლაბორატორიამ შეიმუშავა გენეტიკური დოპინგის გამოვლენის უნარი. ტესტირება დაუყოვნებლივ ჩაერთვება BHA-ს რუტინულ სარბოლო დღეებში და შეჯიბრებების გარეშე აღებულ ნიმუშებში.
BHA-ს მოვალეობის შემსრულებელი აღმასრულებელი დირექტორის, ბრანტ დანშიას განცხადებით, გენეტიკურ დოპინგზე ტესტირება მნიშვნელოვანი ნაბიჯია ბრიტანული საცხენოსნო სპორტისთვის და კიდევ ერთხელ ადასტურებს მათ ერთგულებას ცხენების კეთილდღეობის დაცვის, ჯიშის სიწმინდისა და შეჯიბრებების მთლიანობის შენარჩუნების მიმართ. მეცნიერული და ტექნოლოგიური პროგრესი გენეტიკურ მანიპულაციას ცხენოსნობისთვის რეალურ რისკად აქცევს. აუცილებელია პროაქტიული მიდგომა და უახლესი კვლევების დაფინანსებით, BHA-ს აქვს ტექნოლოგიური შესაძლებლობა აღკვეთოს ნებისმიერი მცდელობა, გამოიყენონ უკანონო მეთოდები ცხენებისთვის უსამართლო უპირატესობის მინიჭებისთვის.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს