ბრიტანული სააგენტო: Oasis-ის ბილეთების გაყიდვამ შესაძლოა გულშემატკივრები შეცდომაში შეიყვანა

ბრიტანეთის კონკურენციისა და ბაზრის სააგენტოს (CMA) განცხადებით, შესაძლოა, Ticketmaster-მა Oasis-ის სარეუნიონო ტურნეს ბილეთების გასაყიდად გამოტანისას, გასულ წელს, არასათანადო ფასებით გულშემატკივრები შეცდომაში შეიყვანა.

CMA-ს მტკიცებით, კომპანიამ შესაძლოა დაარღვია მომხმარებელთა უფლებების დაცვის კანონი, როდესაც "პლატინის" კატეგორიის ბილეთები სტანდარტულ ფასზე თითქმის 2.5-ჯერ ძვირად გაყიდა, იმის ახსნის გარეშე, რომ ამ ბილეთებს რაიმე დამატებითი უპირატესობა არ ჰქონდა. სააგენტოს განცხადებით, ამან შესაძლოა მომხმარებლებში შეცდომაში შემყვანი შთაბეჭდილება შექმნა, თითქოს "პლატინის" ბილეთები უკეთესი იყო.

CMA-მ Ticketmaster-ს მომავალში ბილეთების მარკირებისა და ფასების გამჭვირვალედ გამოქვეყნებისკენ მოუწოდა. Ticketmaster-მა განაცხადა, რომ მიესალმება ამ რეკომენდაციებს. კომპანიის წარმომადგენლის თქმით, ისინი ცდილობენ უზრუნველყონ საუკეთესო ბილეთების პლატფორმა, რომელიც მარტივი, გამჭვირვალე და მომხმარებელზე ორიენტირებული იქნება.

გასული წლის 31 აგვისტოს, Oasis-ის დიდი ხნის ნანატრი სარეუნიონო ტურნესთვის 900 000-ზე მეტი ბილეთი გაიყიდა. თუმცა, ბევრი გულშემატკივარი ფინანსურად დაზარალდა, როდესაც სტანდარტული, დასადგომი ადგილის ბილეთები, რომლებიც 135 ფუნტად იყო რეკლამირებული, მოულოდნელად "მოთხოვნად" გადაკეთდა და Ticketmaster-ზე მათი ფასი 355 ფუნტამდე გაიზარდა.

ამასთან დაკავშირებით, Oasis-მა განაცხადა, რომ მათ არ ჰქონდათ ინფორმაცია, რომ ბილეთების პირველადი გაყიდვისას "დინამიური ფასები" იქნებოდა გამოყენებული.

CMA-მ გამოძიება სექტემბერში დაიწყო, რათა შეესწავლა, ახორციელებდა თუ არა Ticketmaster "არაკეთილსინდისიერ კომერციულ პრაქტიკას" და ხომ არ ხდებოდა გულშემატკივრებზე ზეწოლა, რათა მათ ბილეთები მოკლე დროში შეეძინათ.

Ticketmaster-მა უარყო "დინამიური ფასების" გამოყენება ფასების მანიპულირების მიზნით. კომპანიის ბრიტანეთის დირექტორის, ენდრიუ პარსონსის განცხადებით, ყველა ფასს განსაზღვრავენ შემსრულებლები და პრომოუტერები. თუმცა, Oasis-ის შემთხვევაში, პრომოუტერ კომპანია SJM Concerts-ს კავშირი აქვს Ticketmaster-ის მშობელ კომპანია Live Nation-თან.

CMA-ს დინამიური ფასების საკითხზე კომენტარი არ გაუკეთებია, მაგრამ აღნიშნა, რომ Ticketmaster-მა Oasis-ის გულშემატკივრებს "ინფორმირებული არჩევანის" გაკეთება გაურთულა. მაგალითად, მომხმარებლებმა არ იცოდნენ, რომ არსებობდა დასადგომი ადგილების ორი კატეგორია სხვადასხვა ფასად და რომ ყველა იაფი ბილეთი პირველად გაიყიდა. ამის შედეგად, ბევრი გულშემატკივარი დიდხანს იდგა რიგში და არ იცოდა, რა ფასის გადახდა მოუწევდა, შემდეგ კი უნდა გადაეწყვიტა, გადაეხადა თუ არა მოსალოდნელზე მაღალი ფასი.

სააგენტომ აღიარა, რომ Ticketmaster-მა Oasis-ის ბილეთების გაყიდვის შემდეგ გარკვეული ცვლილებები შეიტანა თავის ბიზნეს პრაქტიკაში. თუმცა, CMA-ს აზრით, ეს ცვლილებები საკმარისი არ არის არსებული პრობლემების მოსაგვარებლად.

CMA მოელის, რომ Ticketmaster ითანამშრომლებს მათთან ამ პრობლემების გადასაჭრელად, რათა მომავალში გულშემატკივრებმა ბილეთების ყიდვისას ინფორმირებული გადაწყვეტილებები მიიღონ.

დიდი ბრიტანეთის მთავრობამ განაცხადა, რომ ყველას უნდა ჰქონდეს სამართლიანი შანსი, შეიძინოს ბილეთები მუსიკალურ და სპორტულ ღონისძიებებზე. მთავრობის წარმომადგენელმა გაიმეორა კულტურის მინისტრის, ლიზა ნენდის სიტყვები, როდესაც მთავრობამ ბილეთების გადაყიდვის ფასის შეზღუდვის გეგმები გამოაცხადა.

მთავრობის წარმომადგენლის თქმით, ყველას სიამოვნებს საყვარელი მუსიკოსების ან სპორტული გუნდების ცოცხლად ნახვის შესაძლებლობა, მაგრამ ძალიან დიდი ხნის განმავლობაში გულშემატკივრები იტანჯებოდნენ გადამყიდველების მიერ ბილეთების გადაჭარბებულ ფასად გადაყიდვის გამო. ასევე, იყო შემთხვევები, როდესაც გამჭვირვალობის ნაკლებობის გამო, მომხმარებლები მოულოდნელად აღმოჩნდნენ მაღალი მოთხოვნის მქონე ღონისძიებებზე ფასების ზრდის წინაშე.

მთავრობა CMA-ს კონსულტაციებზე სრულ პასუხს მოგვიანებით გასცემს. Oasis-ის ტურნე 2025 წლის 4 ივლისს კარდიფის Principality Stadium-ზე დაიწყება.