ჩემპიონთა ლიგაზე კვალიფიკაციის შანსი ინგლისის შვიდი კლუბისთვის

ინგლისურ პრემიერ ლიგას მომავალ სეზონში ჩემპიონთა ლიგაზე დამატებითი ადგილის მოპოვების რეალური შანსი აქვს. ეს შესაძლებლობა ინგლისური გუნდების მიერ ევროტურნირებზე ნაჩვენები წარმატებული თამაშის შედეგად გაჩნდა. ევროპის მასშტაბით, ორი ლიგა, რომელთა კოეფიციენტების რეიტინგი ყველაზე მაღალი იქნება, 2025-2026 წლების ჩემპიონთა ლიგაზე დამატებით ადგილს მიიღებს.

ამჟამად, ინგლისი კოეფიციენტების რეიტინგში ლიდერობს, რაც იმას ნიშნავს, რომ პრემიერ ლიგის მეხუთე ადგილზე გასულ გუნდსაც ექნება ჩემპიონთა ლიგაზე თამაშის უფლება. თუმცა, არსებობს სცენარი, რომლის მიხედვითაც, მომავალ სეზონში ჩემპიონთა ლიგაზე ინგლისის შვიდი კლუბი ითამაშებს.

თითოეული ქვეყნის ლიგის კოეფიციენტი განისაზღვრება იმის მიხედვით, თუ რამდენად წარმატებულად ასპარეზობენ მათი გუნდები უეფას სამ საკლუბო ტურნირზე: ჩემპიონთა ლიგაზე, ევროპის ლიგაზე და კონფერენციის ლიგაზე. კოეფიციენტის ქულები თამაშის შედეგების მიხედვით ირიცხება - მოგებაზე ორი ქულა და ფრეზე ერთი. ერთი და იმავე ქვეყნის კლუბების მიერ მოპოვებული ქულები ჯამდება და იყოფა ევროტურნირებზე მონაწილე კლუბების რაოდენობაზე.

ამ სეზონში, ჩემპიონთა ლიგაზე მოასპარეზე კლუბებს ბონუს ქულები ერიცხებათ, რაც უპირატესობას ანიჭებს იმ ლიგებს, რომლებსაც ამ ტურნირზე მეტი წარმომადგენელი ჰყავთ. კოეფიციენტების ცხრილში პირველ ორ ადგილზე გასული ქვეყნები მომდევნო სეზონში ჩემპიონთა ლიგაზე დამატებით ადგილს იღებენ. ეს ადგილები გადაეცემათ იმ გუნდებს, რომლებიც ამ ლიგებში სტანდარტული ჩემპიონთა ლიგის კვალიფიკაციის ზონის ქვემოთ არიან. პრემიერ ლიგაში, პირველი ოთხი გუნდი ავტომატურად გადის ჩემპიონთა ლიგაზე, ამიტომ დამატებითი ადგილი მეხუთე ადგილზე გასულ გუნდს ერგება.

ამჟამად, ინგლისი კოეფიციენტების ცხრილს ლიდერობს. ინგლისმა ლიდერობა ევროპული ტურნირების პლეი-ოფის ეტაპის დაწყებამდეც შეინარჩუნა. "ასტონ ვილასა" და "არსენალის" მეოთხედფინალში გასვლით, ინგლისმა თავისი პოზიცია კიდევ უფრო გაიმყარა და საშუალო ასოციაციური რეიტინგი 23.035 შეადგინა.

ესპანეთი, რომელსაც ინგლისის მსგავსად, ევროტურნირებზე ხუთი გუნდი ჰყავს დარჩენილი, 20.892 ქულით მეორე ადგილზეა. იტალიის შანსები თებერვალში შესუსტდა, როდესაც "მილანმა", "ატალანტამ" და "იუვენტუსმა" ჩემპიონთა ლიგის პლეი-ოფის მატჩები წააგეს. გერმანიის შანსები ნაკლებად სავარაუდოა. საფრანგეთიდან კი მხოლოდ "პარი სენ-ჟერმენი" და "ლილი" დარჩნენ ჩემპიონთა ლიგაზე.

თუ პრემიერ ლიგა დამატებით ადგილს მოიპოვებს, 2025-2026 წლების ჩემპიონთა ლიგაზე ამ სეზონის მეხუთე ადგილზე გასული გუნდი ითამაშებს.