დანიის სახელმწიფო საფოსტო კომპანია, PostNord, 2025 წლის ბოლოსთვის წერილების მიწოდებას სრულად შეწყვეტს. ამ გადაწყვეტილების მიზეზად კომპანია წერილების მოცულობის 90%-ით შემცირებას ასახელებს, რაც საუკუნის დასაწყისიდან შეინიშნება. ამ ნაბიჯით, ფაქტობრივად, დასრულდება კომპანიის 400-წლიანი ისტორია წერილების მომსახურების სფეროში. ივნისის დასაწყისიდან დაიწყება დანიის მასშტაბით არსებული 1500 საფოსტო ყუთის დემონტაჟი.
დანიის ტრანსპორტის მინისტრმა, თომას დანიელსენმა, საზოგადოებას დაარწმუნა, რომ წერილების გაგზავნა და მიღება კვლავაც შესაძლებელი იქნება, რადგან "წერილებისა და ამანათების ბაზარი თავისუფალია".
ევროპის მასშტაბით საფოსტო სამსახურები წერილების მოცულობის შემცირების პრობლემის წინაშე დგანან. გერმანულმა Deutsche Post-მა განაცხადა, რომ 8000 სამუშაო ადგილს ამცირებს, რასაც "სოციალურად პასუხისმგებლიან ნაბიჯად" აფასებს. Deutsche Post-ში 187,000 თანამშრომელია დასაქმებული და თანამშრომელთა წარმომადგენლები შიშობენ, რომ ეს მხოლოდ დასაწყისია.
დანიაში 2023 წლის ბოლომდე მოქმედებდა საყოველთაო საფოსტო მომსახურება, რომელიც 400 წელს ითვლიდა, თუმცა ციფრული კომუნიკაციების განვითარებამ წერილების გამოყენება მკვეთრად შეამცირა. PostNord-ი აცხადებს, რომ ყურადღებას ამანათების მიწოდებაზე გადაიტანს და წელს ან 2024 წელს შეძენილი საფოსტო მარკების დაბრუნება 2026 წელს შეზღუდული პერიოდის განმავლობაში იქნება შესაძლებელი.
კომპანიის 4600 თანამშრომლიდან 1500 სამუშაო ადგილს კარგავს. ერთ-ერთმა თანამშრომელმა, ანდერს რაუნ მიკელსენმა, დანიურ ტელევიზია DR-თან საუბრისას განაცხადა, რომ ეს "ძალიან სამწუხარო დღეა არა მხოლოდ მათი განყოფილებისთვის, არამედ 1500 ადამიანისთვის, რომელთაც გაურკვეველი მომავალი ელით".
დანია მსოფლიოში ერთ-ერთ ყველაზე ციფრულ ქვეყნად ითვლება. თითქმის ყველაფრისთვის არსებობს აპლიკაცია: ცოტა ადამიანი იყენებს ნაღდ ფულს და დანიელებს მართვის მოწმობები და ჯანმრთელობის ბარათებიც კი სმარტფონებში აქვთ შენახული. საბანკო ამონაწერები, გადასახადები და ადგილობრივი ხელისუფლების კორესპონდენცია ელექტრონულად იგზავნება. სახელმწიფო სერვისები კომუნიკაციას Digital Post-ის აპლიკაციის ან სხვა პლატფორმების საშუალებით ახორციელებენ და PostNord Denmark-ში აცხადებენ, რომ წერილების ბაზარი აღარ არის მომგებიანი.
საუკუნის დასაწყისიდან წერილების რაოდენობა 1.4 მილიარდიდან 110 მილიონამდე შემცირდა გასულ წელს. ეს გადაწყვეტილება ყველაზე მეტად ხანდაზმულებზე აისახება. მიუხედავად იმისა, რომ დანიელების 95% Digital Post-ის სერვისს იყენებს, დაახლოებით 271,000 ადამიანი კვლავ ფიზიკურ ფოსტაზეა დამოკიდებული.
ორგანიზაცია Aeldre Sagen-დან (DaneAge) მარლენე რიშოი კორდესმა დანიურ ტელევიზია TV2-თან განაცხადა, რომ "ბევრი ადამიანია, ვინც ძალიან არის დამოკიდებული წერილების რეგულარულ მიწოდებაზე. ეს მოიცავს საავადმყოფოში ვიზიტებს, ვაქცინაციას ან გადაწყვეტილებებს სახლში მოვლის შესახებ".
PostNord-ი წლების განმავლობაში ფინანსურ სირთულეებს განიცდიდა და გასულ წელს დეფიციტით მუშაობდა. დანიის პარლამენტის წევრმა, პელე დრაგსტედმა, მომხდარში პრივატიზაცია დაადანაშაულა და აღნიშნა, რომ ეს ნაბიჯი არახელსაყრელ მდგომარეობაში აყენებს შორეულ რაიონებში მცხოვრებ ადამიანებს.
2024 წელს ახალი საფოსტო კანონის შემოღებამ წერილების ბაზარი კერძო კომპანიებისთვის გახსნა და ფოსტა დღგ-სგან აღარ არის გათავისუფლებული, რამაც საფოსტო ხარჯების ზრდა გამოიწვია. PostNord Denmark-ის მმართველმა დირექტორმა, კიმ პედერსენმა, ადგილობრივ მედიასთან განაცხადა, რომ "როდესაც წერილი 29 დანიური კრონა (დაახლოებით 12 ლარი) ღირს, წერილების რაოდენობა შემცირდება".
მისი თქმით, დანიელები სულ უფრო მეტად ციფრულები ხდებიან და წერილების მოცულობის შემცირება იმდენად გამოხატული გახდა, რომ მხოლოდ გასულ წელს 30%-ით დაეცა. PostNord-ი ასევე ოპერირებს შვედეთში. კომპანიის 40% დანიის საკუთრებაა, ხოლო 60% - შვედეთის.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს