დევისის თასის დავა საერთაშორისო ჩოგბურთის ფედერაციასა და პიკეს კომპანიას შორის მოგვარდა

ცნობილი გახდა, რომ საერთაშორისო ჩოგბურთის ფედერაციამ (ITF) და ფეხბურთელ ჟერარ პიკეს საინვესტიციო კომპანია "კოსმოსს" შორის არსებული უთანხმოება დევისის თასის ორგანიზებასთან დაკავშირებით მოგვარდა. მხარეებმა ურთიერთშეთანხმებას მიაღწიეს. შეგახსენებთ, რომ 2018 წელს ITF-სა და "კოსმოსს" შორის გაფორმდა მრავალმილიარდიანი კონტრაქტი, რომელიც მამაკაცთა ნაკრებების ტურნირის, დევისის თასის, რეორგანიზაციას ითვალისწინებდა. თუმცა, 2023 წელს "კოსმოსმა" ხელშეკრულების პირობების გადახედვა მოითხოვა, რის შემდეგაც ITF-მა კონტრაქტი შეწყვიტა. "კოსმოსმა" ITF-ს სასამართლოში უჩივლა და კონტრაქტის "უსაფუძვლო შეწყვეტაში" დაადანაშაულა, თუმცა ახლა მხარეები შეთანხმდნენ. ორივე ორგანიზაციამ ერთმანეთს მომავალ პროექტებში წარმატება უსურვა.