"ფეისბუქის" ყოფილი მაღალი რანგის თანამშრომელი ბი-ბი-სისთან საუბარში აცხადებს, რომ სოციალური მედიის გიგანტი ჩინეთის მთავრობასთან მჭიდრო თანამშრომლობით ცდილობდა პეკინისთვის კონტენტის ცენზურისა და კონტროლის შესაძლებლობების შექმნას.
სარა უინ-უილიამსი, რომელიც წარსულში გლობალური საჯარო პოლიტიკის დირექტორი იყო, ამტკიცებს, რომ ჩინეთის ასობით მილიონი მომხმარებლის ბაზარზე შესვლის სანაცვლოდ, "ფეისბუქის" დამფუძნებელი მარკ ცუკერბერგი მზად იყო დათანხმებულიყო ვირუსულად გავრცელებული პოსტების დამალვაზე, სანამ მათ ჩინეთის ხელისუფლება გადაამოწმებდა.
უინ-უილიამსმა, რომლის განცხადებებიც მის ახალ წიგნშია ასახული, აშშ-ის ფასიანი ქაღალდებისა და ბირჟების კომისიაში (SEC) საჩივარი შეიტანა, სადაც "მეტას" ინვესტორების შეცდომაში შეყვანაში ადანაშაულებს. ბი-ბი-სიმ აღნიშნული საჩივარი შეისწავლა.
"ფეისბუქის" მშობელი კომპანია "მეტა" აცხადებს, რომ უინ-უილიამსს სამსახური 2017 წელს "ცუდი მუშაობის" გამო შეუწყდა. კომპანიის განცხადებით, "საიდუმლო არ არის, რომ ოდესღაც ჩინეთში ოპერირებით ვიყავით დაინტერესებულნი, თუმცა საბოლოოდ, განხილული იდეების განხორციელებაზე უარი ვთქვით".
"მეტა" მარკ ცუკერბერგის 2019 წლის კომენტარსაც იხსენებს, სადაც ის ამბობს: "ჩვენ ვერასდროს შევთანხმდით იმაზე, თუ რა დასჭირდებოდათ მათ ჩვენგან იქ ოპერირებისთვის და მათ [ჩინეთმა] არასდროს შეგვიშვეს".
უინ-უილიამსი ასევე ამტკიცებს, რომ "ფეისბუქი" ალგორითმებს იყენებდა მოზარდებში დაუცველობის შეგრძნების გამოსავლენად, რაც სარეკლამო კვლევის ნაწილი იყო.
ახალი ზელანდიის ყოფილი დიპლომატი, რომელიც "ფეისბუქს" 2011 წელს შეუერთდა, აცხადებს, რომ კომპანიის ზრდას "პირველი რიგიდან" ადევნებდა თვალს. ახლა მას სურს აჩვენოს ის "გადაწყვეტილებები და მორალური კომპრომისები", რომლებიც, მისი თქმით, იქ მუშაობის დროს ხდებოდა. ეს კრიტიკული მომენტია, დასძენს ის, რადგან "ბევრი ადამიანი, ვისთანაც ვმუშაობდი, ხელოვნური ინტელექტის დანერგვაში ცენტრალურ როლს შეასრულებს".
თავის მემუარებში, უინ-უილიამსი აღწერს, თუ როგორი იყო "ფეისბუქის" მაღალ თანამდებობებზე მუშაობა. მისი თქმით, ცუკერბერგი შუადღემდე არ დგებოდა, უყვარდა კარაოკე და არ უყვარდა სამაგიდო თამაშებში, მაგალითად, "რისკში" დამარცხება. "არ მეგონა, რომ უნდა დამეთმო. ცოტა გულუბრყვილო ვიყავი", - განაცხადა მან.
უინ-უილიამსი ამბობს, რომ მისი ბრალდებები კომპანიის ჩინეთთან მჭიდრო ურთიერთობის შესახებ, "ფეისბუქის" იმ დროინდელი გადაწყვეტილებების მიღების პროცესის გაგებაში გვეხმარება.
"ჩინეთი მარკ ცუკერბერგის თეთრი ვეშაპია", რაც იმას ნიშნავს, რომ ეს არის მიზანი, რომელსაც იგი დაჟინებით მისდევდა, ამბობს უინ-უილიამსი. ქვეყანა სოციალური მედიის მსოფლიოში უდიდესი ბაზარია, თუმცა "ფეისბუქზე" წვდომა იქ კვლავ დაბლოკილია, ისევე როგორც X-სა და YouTube-ზე. "ეს არის ერთადერთი ნაწილი სამაგიდო თამაშში, რომელიც მას ჯერ არ დაუპყრია", - ამბობს ის.
უინ-უილიამსი ამტკიცებს, რომ 2010-იანი წლების შუა პერიოდში, ჩინეთის მთავრობასთან მოლაპარაკებების ფარგლებში, "ფეისბუქი" განიხილავდა მომავალში ჩინეთის მოქალაქეების მონაცემებზე წვდომის დაშვებას.
"ის ჩინეთის კომუნისტურ პარტიასთან მჭიდროდ თანამშრომლობდა და ცენზურის ინსტრუმენტს ქმნიდა... ძირითადად, მუშაობდა "ფეისბუქის" ძირითადი პრინციპების საწინააღმდეგო რაღაცის შესაქმნელად", - განუცხადა მან ბი-ბი-სის.
უინ-უილიამსი ამბობს, რომ მთავრობები ხშირად ითხოვდნენ ახსნას, თუ როგორ მუშაობდა "ფეისბუქის" პროგრამული უზრუნველყოფის გარკვეული ასპექტები, მაგრამ ეუბნებოდნენ, რომ ეს საკუთრების ინფორმაცია იყო. "მაგრამ როდესაც საქმე ჩინელებს ეხებოდა, ფარდა აეხადა", - ამბობს ის. "ინჟინრები გამოიყვანეს. მათ დეტალურად აუხსნეს ყველაფერი და "ფეისბუქი" დარწმუნდა, რომ ჩინელი ჩინოვნიკები საკმარისად კვალიფიციურები იყვნენ, რათა არა მხოლოდ გაეგოთ ამ პროდუქტების შესახებ, არამედ გამოეცადათ "ფეისბუქი" ამ პროდუქტების ცენზურის ვერსიაზე, რომელსაც ისინი ქმნიდნენ".
"მეტამ" ბი-ბი-სის განუცხადა, რომ ჩინეთის შესახებ მსგავსი განცხადებები იმ დროს "ფართოდ იყო გავრცელებული".
SEC-ში შეტანილ საჩივარში უინ-უილიამსი ასევე ამტკიცებს, რომ ცუკერბერგმა და "მეტას" სხვა აღმასრულებლებმა "შეცდომაში შემყვანი განცხადებები გააკეთეს კონგრესის გამოძიებების საპასუხოდ" ჩინეთის შესახებ.
კონგრესისთვის 2018 წელს ცუკერბერგის მიერ გაცემულ ერთ-ერთ პასუხში ნათქვამია, რომ "ფეისბუქს" "არ შეუძლია ზუსტად იცოდეს, როგორ შეეცდება [ჩინეთის] მთავრობა გამოიყენოს თავისი კანონები და რეგულაციები კონტენტზე". "მეტამ" ბი-ბი-სის განუცხადა, რომ ცუკერბერგმა ზუსტი ჩვენება მისცა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს