ყოფილ ფეხბურთელ პეტკო განჩევს კვირა დღის მეორე ნახევარი, რომელიც მის ყოფილ გუნდ "არდა კარჯალის" თამაშის ყურებაში უნდა გაეტარებინა, მეგობრებისა და ოჯახის წევრების დარწმუნებაში გადაიზარდა, რომ ცოცხალი იყო. ბულგარეთის უმაღლესი ლიგის გუნდმა განჩევს წუთიერი დუმილით პატივი მიაგო მატჩის დაწყებამდე, რადგან შეცდომით ეგონათ, რომ 78 წლის ფეხბურთელი გარდაიცვალა.
"თამაშის დაწყებას 10 წუთით დავაგვიანე პირადი საქმის გამო. სახლში რომ მივდიოდი, ტელეფონმა ბევრჯერ დარეკა," - განაცხადა ყოფილმა თავდამსხმელმა განჩევმა. "სახლის წინ გავაჩერე მანქანა, ეზოში შევედი და ცოლი ტირილით შემეგება და ყვიროდა: 'პეტკო, პეტკო, ტელევიზიით გამოაცხადეს, რომ გარდაიცვალე!' ვერ გავიგე რას მეუბნებოდა და რა მოხდა. შემდეგ ორმა მეგობარმა დამირეკა. ცოცხლად დამარხვა საკმაოდ სტრესულია."
"არდამ" სწრაფად გააცნობიერა შეცდომა და მატჩის დასრულებამდე კლუბის Facebook-ის გვერდზე გამოაქვეყნა ინფორმაცია, რომ დეზინფორმირებულები იყვნენ. განჩევმა, რომელიც "არდაში" ხუთი წელი თამაშობდა, თქვა, რომ კლუბის სპორტულმა დირექტორმა ივაილო პეტკოვმა დაურეკა ბოდიშის მოსახდელად.
"იცით, ხანდახან ასეთი რაღაცეები ხდება, მაგრამ სიტუაცია ადვილი სულაც არ იყო," - თქვა განჩევმა. "ნორმალურია, რომ სოფელში ჭორი გავრცელდეს, მაგრამ ეს მთელი ბულგარეთის საფეხბურთო აუდიტორიის წინაშე გამოაცხადეს. ამდენმა ადამიანმა დამირეკა - ნათესავებმა, მეგობრებმა, ნაცნობებმა და არც ისე დიდმა ნაცნობებმა. სიტუაცია სასიამოვნო არ იყო, მაგრამ საბოლოოდ პოზიტიურად უნდა ვიყოთ განწყობილნი."
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს