გარდაიცვალა ჯგუფ "Five Star"-ის წევრი, სტედმან პირსონი

60 წლის ასაკში გარდაიცვალა სტედმან პირსონი, ბრიტანული პოპ-ჯგუფ "Five Star"-ის ერთ-ერთი წევრი. ამის შესახებ მისმა ოჯახმა განაცხადა.

დენის პირსონის თქმით, მისი ძმა, სტედმანი, ორშაბათს გარდაიცვალა. იგი დიაბეტით იტანჯებოდა და დიალიზზე იმყოფებოდა.

სტედმანი და დენისი, დებ ლორეინთან და დორისთან, და ძმასთან, დელროისთან ერთად, ჯგუფის წევრები იყვნენ. მათი ერთნაირი სამოსი და სინქრონიზებული საცეკვაო მოძრაობები მათ "The Jackson 5"-ის ბრიტანულ ანალოგად აქცევდა.

ოჯახის განცხადებაში ნათქვამია: "იგი ბოლომდე ჯენტლმენი იყო - ყველა თვალსაზრისით და საოცარი შვილი, ძმა და ბიძა. იმედი გვაქვს, რომ მოგონებები და სიყვარული, რომელიც მან ჩვენ და სამყაროს მოგვანიჭა, ჩვენი უდიდესი ნუგეში იქნება. ძალიან დაგვაკლდება."

"Five Star"-მა სადებიუტო ალბომი "Luxury of Life" 1985 წელს გამოუშვა, რასაც 1986 წელს მოჰყვა "Silk and Steel", რომელიც ჩარტების სათავეში მოექცა. ჯგუფს ბრიტანეთის ჩარტებში ექვსი ტოპ-10 სინგლი ჰქონდა, მათ შორის "System Addict", "Can't Wait Another Minute" და "Rain or Shine".

ხუთმა და-ძმამ 1987 წელს Brit Award-ზე საუკეთესო ბრიტანული ჯგუფის ტიტული მოიპოვა. ჯგუფი თავდაპირველად 1995 წელს დაიშალა, მაგრამ 2001 წელს კვლავ შეიკრიბა. 2012 წელს კიდევ ერთი გაერთიანება შედგა და ლორეინის წასვლის შემდეგ, ჯგუფმა ოთხ წევრად 2016 წლამდე განაგრძო მოღვაწეობა.

სტედმანი ასევე გამოჩნდა ტელევიზიაში 2006 და 2008 წლებში - თავდაპირველად Channel 5-ის "The All Star Talent Show"-ში და მოგვიანებით BBC Three-ის "Celebrity Scissorhands"-ში.

მომღერალი, რომელიც ესექსის საგრაფოს ქალაქ რომფორდიდან იყო, ხუთ და-ძმას შორის უფროსი იყო. ჯგუფი 1983 წელს მათმა მამამ, ბასტერ პირსონმა, რომელიც ასევე მომღერალი იყო, ჩამოაყალიბა.