გერმანიაში ხუთი პირი მინისტრის გატაცების მცდელობისთვის დააპატიმრეს

გერმანიაში, ხუთი პირი, რომლებიც უკიდურესი მემარჯვენე ჯგუფის წევრები არიან, დააპატიმრეს ხელისუფლების დამხობისა და ჯანდაცვის მინისტრის გატაცების მცდელობისთვის. ოთხი მათგანი, სასამართლომ ტერორისტული ორგანიზაციის ლიდერებად გამოაცხადა. აღნიშნული ორგანიზაცია გეგმავდა ძალადობის გამოყენებით გერმანიაში სამოქალაქო ომის მსგავსი სიტუაციის შექმნას.

ჯგუფის მიზანი იყო ჯანდაცვის მინისტრის, კარლ ლაუტერბახის გატაცება, რომელიც პანდემიის დროს მკაცრი შეზღუდვების მომხრე იყო. საჭიროების შემთხვევაში, ისინი მზად იყვნენ მისი პირადი დაცვის წევრები მოეკლათ. შინაგან საქმეთა მინისტრის, ნენსი ფეზერის განცხადებით, ბრალდებულები ეროვნული უსაფრთხოებისთვის უდიდეს საფრთხეს წარმოადგენდნენ.

კობლენცის უმაღლესი რეგიონული სასამართლოს ინფორმაციით, ჯგუფი 2022 წლის იანვარში შეიკრიბა და შეიმუშავა გეგმა, რომელიც ელექტროენერგიის ქსელის გამორთვის მიზნით დივერსიული თავდასხმის განხორციელებასაც მოიცავდა. ჯგუფის წევრები, ოთხი მამაკაცი 46-დან 58 წლამდე და ერთი 77 წლის ქალი, იმედოვნებდნენ, რომ მათ უსაფრთხოების ძალების უკმაყოფილო წარმომადგენლებიც შეუერთდებოდნენ.

ოთხ ბრალდებულს, რომლებსაც ლიდერებად მიიჩნევენ, დასავლეთ გერმანიის სასამართლომ ხუთი წლიდან ცხრა თვემდე და რვა წლამდე თავისუფლების აღკვეთა მიუსაჯა. მეხუთე ბრალდებულმა, თითქმის ორწლიანი სასამართლო პროცესის შემდეგ, ორი წლითა და ათი თვით პატიმრობა მიიღო. მსჯავრდებულთა ვინაობა ჯერჯერობით არ გამოქვეყნებულა.

აღნიშნული ჯგუფი დაკავშირებულია "რაიხის მოქალაქეებთან", რომელთა მიმდევრებსაც სჯერათ, რომ გერმანიის იმპერია, რომელიც 1918 წელს დაინგრა, კვლავაც არსებობს. გამოძიების თანახმად, ჯგუფს ხელმძღვანელობდა ჰაინრიხ XIII პრინცი როისი, გერმანელი არისტოკრატი. ისინი ასევე შთაგონებას იღებდნენ QAnon-ის კონსპირაციული თეორიის მოძრაობიდან, რომელიც აშშ-ში დონალდ ტრამპის ზოგიერთ მხარდამჭერთან ასოცირდება.

განაჩენის გამოცხადების შემდეგ, ლაუტერბახმა, რომელიც ცენტრ-მემარცხენე სოციალ-დემოკრატიული პარტიის (SDP) წევრია, მადლობა გადაუხადა პოლიციას და განაცხადა, რომ სახელმწიფომ აჩვენა, რომ "მას შეუძლია დაიცვას თავი ძალადობრივი კონსპირაციული თეორიებისგან". ფეზერმა აღნიშნა, რომ "სახელმწიფო გადატრიალების, ელექტროენერგიის ინფრასტრუქტურაზე თავდასხმების, ჯანდაცვის მინისტრის კარლ ლაუტერბახის გატაცებისა და მისი პირადი დაცვის წევრების მკვლელობის ძალადობრივი გეგმები უდიდეს საფრთხეს წარმოადგენდა". მან ასევე დასძინა, რომ უსაფრთხოების სამსახურები სერიოზულად ეკიდებიან "რაიხის მოქალაქეების" მიერ შექმნილ საფრთხეებს და "ჩვენ ვიცავთ ჩვენს დემოკრატიას". აღნიშნული განაჩენი მოჰყვა რამდენიმე სასამართლო პროცესს, რომელიც მიმართული იყო უკიდურესი მემარჯვენე ჯგუფების წინააღმდეგ, რომლებიც დაკავშირებულია "რაიხის მოქალაქეებთან" და არ აღიარებენ თანამედროვე გერმანიის სახელმწიფოს ლეგიტიმურობას.