იან მაკკელენი და პატრიკ სტიუარტი "შურისმაძიებლები: განკითხვის დღის" მსახიობებს უერთდებიან

ცნობილი მსახიობები, სერ იან მაკკელენი და სერ პატრიკ სტიუარტი, რომლებიც მაყურებელმა "იქს-ადამიანებიდან" გაიცნო, მარველის მომავალ ფილმში, სახელწოდებით "შურისმაძიებლები: განკითხვის დღე", საკუთარ როლებს დაუბრუნდებიან. ფილმის პრემიერა 2026 წლის მაისში იგეგმება. უკვე ცნობილია, რომ რობერტ დაუნი უმცროსი მთავარი ანტაგონისტის, დოქტორ დუმის როლს შეასრულებს.

იან მაკკელენს მაგნეტოს როლი 2014 წლის შემდეგ არ უთამაშია, ხოლო პატრიკ სტიუარტმა პროფესორ ჩარლზ ქსავიეს როლი ბოლოს 2022 წელს, ფილმში "დოქტორი სტრეინჯი სიგიჟის მულტისამყაროში" მოირგო.

Marvel Studios-მა ახალი ფილმის მსახიობების სია ვიდეოს სახით გამოაქვეყნა, სადაც სკამების რიგი იყო წარმოდგენილი, რომელთა საზურგეებზეც მსახიობების სახელები ეწერა. იან მაკკელენისა და პატრიკ სტიუარტის გარდა, სიაში ასევე ფიგურირებენ კრის ჰემსვორტი, ტომ ჰიდლსტონი და ენტონი მაკი. მათ შეუერთდებიან ფლორენს პიუ, რომელიც ელენა ბელოვას როლს ასრულებს და სიმუ ლიუ, რომელიც შანგ-ჩის როლს თამაშობს.

სკამები ასევე დაეთმოთ სებასტიან სტანს, ლეტიცია რაიტს, პოლ რადს, უაიტ რასელს, ტენოჩ უერტა მეხიას, დევიდ ჰარბორსა და კელსი გრემერს. მათთან ერთად იქნებიან "ფანტასტიკური ოთხეულის" გადატვირთვის მსახიობებიც, მათ შორის "The Last of Us"-ის ვარსკვლავი პედრო პასკალი და "The Bear"-ის მსახიობი ებონ მოს-ბაჩრახი. ჩენინგ ტატუმი, რომელიც "იქს-ადამიანებში" გემბიტის როლს ასრულებდა, ასევე დასახელებულია მსახიობთა სიაში.

შეგახსენებთ, რომ გასულ ზაფხულს დაუნი უმცროსის მარველის კინემატოგრაფიულ სამყაროში დაბრუნების შესახებ გახდა ცნობილი, თუმცა არა რკინის კაცის როლით, რომელმაც ბლოკბასტერების ფრენჩაიზას დასაბამი მისცა. კომიქსების კონვენციაზე, სან დიეგოში, დაუნი უმცროსი სცენაზე დოქტორ დუმის ნიღბითა და მწვანე მოსასხამით გამოჩნდა, სანამ თაყვანისმცემლების წინაშე სახეს გამოაჩენდა. ჟურნალისტებთან საუბრისას მან განაცხადა: "რთული პერსონაჟების თამაში მომწონს".

59 წლის მსახიობმა მნიშვნელოვანი როლი ითამაშა მარველის კინოსამყაროს შექმნაში, 2008 წელს პირველ ფილმში, "რკინის კაცში" ითამაშა. მან მარველის ფილმში ბოლოს 2019 წელს, "შურისმაძიებლები: დასასრულში" გამოჩნდა. ამერიკელმა მსახიობმა გასულ წელს "ოპენჰაიმერში" შესრულებული როლისთვის ოსკარი მიიღო.