ცნობილი ბელგიელი მცველი, იან ვერტონგენი, პროფესიონალურ ფეხბურთს მიმდინარე სეზონის ბოლოს დაემშვიდობება. 37 წლის ფეხბურთელი, რომელიც ამჟამად ბელგიურ "ანდერლეხტში" კაპიტნის სტატუსით ასპარეზობს, ლონდონის "ტოტენჰემ ჰოთსპურში" რვა წლის განმავლობაში თამაშობდა. ამ პერიოდში მან 315 მატჩი ჩაატარა და ორჯერ დასახელდა პრემიერ ლიგის წლის სიმბოლურ გუნდში. ასევე, მნიშვნელოვანი წვლილი შეიტანა "ტოტენჰემის" ჩემპიონთა ლიგის ფინალში გასვლაში 2019 წელს.
ვერტონგენმა გასულ წელს დაასრულა სანაკრებო კარიერა, ბელგიის ნაკრებში ჩატარებული 157 მატჩით, რაც რეკორდული მაჩვენებელია. მიმდინარე სეზონში ტრავმების გამო "ანდერლეხტის" შემადგენლობაში მხოლოდ ხუთ შეხვედრაში მიიღო მონაწილეობა.
ფეხბურთელის განცხადებით, მისთვის სულ უფრო რთული ხდება ფიზიკურად მომზადება ვარჯიშებისა და მატჩებისთვის, რათა აჩვენოს ის თამაში, რომლის დემონსტრირებაც სურს გულშემატკივრების, თანაგუნდელებისა და, პირველ რიგში, საკუთარი თავის წინაშე. სწორედ ამიტომ, მან მიიღო გადაწყვეტილება, მიმდინარე სეზონის შემდეგ დაასრულოს საფეხბურთო კარიერა.
"ტოტენჰემში" გადასვლამდე ვერტონგენი ამსტერდამის "აიაქსში" თამაშობდა, სადაც ორჯერ მოიგო ერედივიზიონი და ნიდერლანდების თასი. ლონდონის დატოვების შემდეგ კი პორტუგალიის ჩემპიონატი "ბენფიკასთან" ერთად მოიგო.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს