"კადილაკი" ფორმულა 1-ში 2026 წლიდან იასპარეზებს

ამერიკული ავტოგიგანტი "ჯენერალ მოტორსი", რომლის პრემიუმ ბრენდიც "კადილაკია", 2026 წლიდან ფორმულა 1-ში ოფიციალურად მიიღებს მონაწილეობას. გუნდი სწორედ "კადილაკის" სახელით იასპარეზებს. ეს გადაწყვეტილება კომპანიასთან წინასწარი შეთანხმების მიღწევიდან ორ თვეზე ოდნავ მეტი ხნის შემდეგ გახდა ცნობილი. მანამდე, ფორმულა 1-მა უარი თქვა ამერიკული გუნდის, "ანდრეტის" განაცხადზე, რომელიც "კადილაკთან" იყო დაკავშირებული. თუმცა, "ჯენერალ მოტორსის" მიერ წარმოდგენილმა ახალმა, უფრო სერიოზულმა წინადადებამ, ფორმულა 1 დაარწმუნა, რომ "კადილაკი" დაეშვა. ფორმულა 1-ისა და ავტოსპორტის მმართველი ორგანოს, FIA-ს ერთობლივ განცხადებაში ნათქვამია, რომ "კადილაკის" განაცხადი დამტკიცდა "მათი სპორტული, ტექნიკური და კომერციული შეფასებების დასრულების შემდეგ". გუნდს ამერიკული ორგანიზაცია TWG უხელმძღვანელებს. ახალი გუნდი, რომლის ბაზაც დიდ ბრიტანეთში, სილვერსტოუნში მდებარეობს, "ჯენერალ მოტორსისა" და TWG-ის ერთობლივი ძალისხმევა იქნება. პროექტში ასევე მონაწილეობენ ამერიკული გუნდის "ანდრეტი გლობალის" მფლობელი დენ ტოურისი და TWG-ის წარმომადგენელი მარკ ვოლტერი. ყოფილი ინდიქარის და ფორმულა 1-ის მრბოლელი მაიკლ ანდრეტი, აღარ არის ჩართული გუნდში, რომელიც მან დააარსა. მის მამას, 1978 წლის მსოფლიო ჩემპიონს, მარიო ანდრეტის, საკონსულტაციო როლი ექნება. შარშან, TWG-მ გუნდის ხელმძღვანელად ბრიტანელი გრემ ლოუდონი დაასახელა, რომელიც 2010-2016 წლებში ფორმულა 1-ში მოასპარეზე "მანორის" გუნდის ერთ-ერთი ხელმძღვანელი იყო. ფორმულა 1-ის პრეზიდენტმა და აღმასრულებელმა დირექტორმა სტეფანო დომენიკალიმ განაცხადა, რომ "ჯენერალ მოტორსის" ვალდებულება, ფორმულა 1-ში "კადილაკის" გუნდი შემოეყვანა, სპორტის ევოლუციის მნიშვნელოვანი და პოზიტიური დემონსტრირებაა. ფორმულა 1-მა ხაზი გაუსვა იმ საკვანძო ფაქტორებს, რომლებმაც "ანდრეტის" თავდაპირველ განაცხადთან შედარებით, უპირატესობა მიანიჭა "კადილაკს". ესენია: სრული საწარმოო გუნდის შექმნის ვალდებულება, ძრავების მიწოდების შესახებ შეთანხმება "ფერარისთან" და "ჯენერალ მოტორსის" ვალდებულება, მომავალში საკუთარი ძრავის წარმოება. ასევე, როლი ითამაშა აშშ-ის იუსტიციის დეპარტამენტის მიერ ფორმულა 1-ის თავდაპირველი გადაწყვეტილების გამოძიებამ, რომელმაც "ანდრეტის" განაცხადი უარყო. FIA-მ "ანდრეტის" განაცხადი ფორმულა 1-ის თავდაპირველ უარყოფამდე დაამტკიცა. FIA-ს პრეზიდენტმა მოჰამედ ბენ სულაიემმა ეს გადაწყვეტილება "ტრანსფორმაციულ მომენტად" შეაფასა. ტოურისის თქმით, ისინი წლების განმავლობაში "ჯენერალ მოტორსთან" ერთად მუშაობდნენ, რათა ფორმულა 1-ში შესვლისთვის მყარი საფუძველი შეექმნათ. "ჯენერალ მოტორსი" ფორმულა 1-ში ახალი ძრავის რეგულაციებით დაინტერესდა, რომლებიც მომავალი წლიდან ახალ შასის წესებთან ერთად შევა ძალაში. ეს წესები გაზრდის ჰიბრიდული ძრავის მიერ გამომუშავებული სიმძლავრის პროპორციას დაახლოებით 50%-მდე, ამჟამინდელი 20%-დან და სავალდებულოს გახდის სრულად მდგრადი საწვავის გამოყენებას. ახალმა წესებმა ასევე მიიზიდა "ჯენერალ მოტორსის" ამერიკელი კონკურენტი "ფორდი" და გერმანული "აუდი", და დაარწმუნა "ჰონდა", რომ დარჩენილიყო ფორმულა 1-ში. "ფორდი" პარტნიორობას იწყებს "რედ ბულთან", რომელიც 2026 წლიდან საკუთარი ძრავის წარმოებას დაიწყებს, ხოლო "აუდიმ" შეიძინა "ზაუბერის" გუნდი და მომავალი წლიდან მას სახელს გადაარქმევს. "ჰონდა" "რედ ბულიდან" "ასტონ მარტინში" გადადის. "რენომ", რომელიც "ალპინის" გუნდის მფლობელია, გადაწყვიტა, რომ ფორმულა 1-ისთვის საკუთარი ძრავის წარმოება ეკონომიკურად მომგებიანი არ არის და შეწყვიტა თავისი ხანგრძლივი პროგრამა. "ალპინი" მომავალი წლიდან "მერსედესის" ძრავებს შეიძენს.