ინგლისის ნაკრების კაპიტანმა, ჰარი კეინმა განაცხადა, რომ ფეხბურთელების აზრს მატჩების გადატვირთული განრიგის თაობაზე სათანადოდ არ ითვალისწინებენ. პრემიერ ლიგის სეზონის დასრულებისთანავე, 25 მაისს და ჩემპიონთა ლიგის ფინალის შემდეგ, 31 მაისს, საერთაშორისო მატჩების ფანჯარა 2-დან 10 ივნისამდე პერიოდში გაიმართება. კეინის კლუბი, მიუნხენის "ბაიერნი", ფიფას ახალ, გაფართოებულ საკლუბო მსოფლიო ჩემპიონატშიც მიიღებს მონაწილეობას, რომელიც 15 ივნისიდან 13 ივლისამდე გაგრძელდება. ეს კი იმას ნიშნავს, რომ თავდამსხმელს ზაფხულში სრულფასოვანი დასვენების შესაძლებლობა არ ექნება.
მიუხედავად ამისა, 31 წლის ფეხბურთელი აპირებს, რაც შეიძლება მეტი ითამაშოს ტიტულების მოსაპოვებლად. მისი თქმით, გულახდილად რომ ვთქვათ, ფეხბურთელების აზრს დიდად არავინ ითვალისწინებს. ყველას თავისი წილი სურს, თავისი ტურნირი, თავისი პრიზი და ფეხბურთელებს უწევთ ამ ყველაფერთან შეგუება. თუმცა, ეს რეალობაა. მე მიყვარს ფეხბურთის თამაში და არასდროს ვიწუწუნებ ამაზე. თუ კარგად მართავ პროცესს მწვრთნელებთან და კლუბებთან ერთად, არსებობს გარკვეულ მომენტებში მეტი დასვენების შესაძლებლობები. თუმცა, ეს მარტივი საკითხი არ არის. ვფიქრობ, ორივე მხრიდან ბალანსის დაცვაა შესაძლებელი, მაგრამ ვნახოთ, როგორ განვითარდება მოვლენები.
კეინის კომენტარები ლივერპულის ბრაზილიელი მეკარის, ალისონ ბეკერის მიერ გასულ სექტემბერში გაკეთებულ განცხადებებს ეხმიანება. მანჩესტერ სიტის შვეიცარიელმა მცველმა, მანუელ აკანჯიმ კი განაცხადა, რომ შესაძლოა მომდევნო დაბადების დღის შემდეგ კარიერის დასრულება მოუწიოს მატჩების გადატვირთული განრიგის გამო. პროფესიონალ ფეხბურთელთა ასოციაციამ გასულ ზაფხულს ფიფას წინააღმდეგ სარჩელი შეიტანა "გადატვირთული და განუხორციელებელი" საფეხბურთო კალენდრის გამო.
კეინმა ინგლისის ნაკრების მაისურით 71-ე გოლი ლატვიის წინააღმდეგ მსოფლიო ჩემპიონატის შესარჩევ მატჩში გაიტანა. მას პიტერ შილტონის რეკორდამდე, 125 მატჩამდე, 20 შეხვედრა აშორებს. ლატვიაზე გამარჯვებამ ინგლისის ახალ მთავარ მწვრთნელს, თომას ტუხელს, თანამდებობაზე ორი მატჩიდან ორივე მოაგებინა. მანამდე, მისმა გუნდმა ალბანეთი 2:0 დაამარცხა. ტუხელის გუნდი ივნისში მსოფლიო ჩემპიონატის საკვალიფიკაციო ეტაპზე ანდორას დაუპირისპირდება, რასაც სენეგალთან ამხანაგური მატჩი მოჰყვება. გერმანელი სპეციალისტის თქმით, შესაძლოა ამ ფანჯრის კალენდარში გადატანა გახდეს საჭირო.
მისი განცხადებით, ის ნაკლებად ღელავს ფეხბურთელების მიერ ჩატარებული მატჩების საერთო რაოდენობაზე. უფრო მეტად აწუხებს ის ფაქტი, რომ მათ არასდროს აქვთ სამი-ოთხი კვირის სრულფასოვანი დასვენება. შესაძლოა, მათ სამი კვირა შვებულება ჰქონდეთ, მაგრამ ხუთი დღის შემდეგ სხვა ტურნირში უწევთ თამაში. ეს არის პრობლემა. მათ მინიმუმ სამი ან სამნახევარი კვირა უნდა ჰქონდეთ მოსამზადებლად, რაც ყველასთვის უკეთესი იქნება. ზოგადად, საკლუბო თუ სანაკრებო მწვრთნელისთვის ფიფას ივნისის ფანჯარა სადავო საკითხია, რამდენად აქვს ამას აზრი. ტუხელის თქმით, ფიფამ უნდა მოახდინოს კალენდრის კოორდინაცია და იპოვოს ადგილი, სადაც ამ ფანჯრის სხვაგან გადატანა იქნება შესაძლებელი, ფეხბურთელების საკეთილდღეოდ.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს