"ჩელსის" მცველმა, ლევი კოლუელმა, განაცხადა, რომ მთავარი მწვრთნელი, ენცო მარეკა, ფეხბურთის ხედვით "ნათელი წლებით უსწრებს ყველას". 22 წლის ინგლისელმა მცველმა, მარეკას ხელმძღვანელობით, მიმდინარე სეზონში "ჩელსის" მაისური 25-ჯერ მოირგო. გუნდი ჩემპიონთა ლიგის საგზურისთვის იბრძვის და პრემიერ ლიგის სატურნირო ცხრილში მეხუთე ადგილზე იმყოფება.
კოლუელმა ხაზი გაუსვა, რომ მარეკა მას ფეხბურთის სრულიად განსხვავებული კუთხით გააზრებაში ეხმარება და მისგან ბევრი რამის სწავლა შეუძლია. მან აღნიშნა, რომ სხვადასხვა დროს არაერთ შესანიშნავ მწვრთნელთან უმუშავია, მაგრამ მარეკას მიდგომა განსაკუთრებულია.
კოლუელი "ჩელსის" აკადემიაში ცხრა წლამდე ასაკიდან ირიცხება და ამაყობს იმით, თუ როგორ ზრუნავენ კლუბში ახალგაზრდა ფეხბურთელებზე. მისი თქმით, "ჩელსის" აკადემია მოთამაშეებს ნამდვილ "მხეცებად" აქცევს. მან ასევე გამოყო რამდენიმე პერსპექტიული ახალგაზრდა ფეხბურთელი, რომლებიც მალე დიდ წარმატებებს მიაღწევენ.
მცველმა გაიხსენა ის განსაკუთრებული ემოცია, რაც "საუთჰემპტონის" წინააღმდეგ გატანილ გოლს უკავშირდებოდა, რადგან ბავშვობაში სწორედ ამ გუნდის წინააღმდეგ "ჩელსის" მაისურით გოლის გატანაზე ოცნებობდა. მანამდე ის "საუთჰემპტონის" აკადემიაშიც ირიცხებოდა, თუმცა "ჩელსიმ" მას გაცილებით მეტი სიყვარული და მხარდაჭერა შესთავაზა.
კოლუელმა პირველი გუნდის დონეზე თამაშის გამოცდილება "ჰადერსფილდში" იჯარით ყოფნის დროს მიიღო. მან აღნიშნა, რომ სწორედ ამ პერიოდმა ჩამოაყალიბა ის ადამიანად და ფეხბურთელად. მოგვიანებით, ის "ბრაიტონშიც" თამაშობდა, სადაც რობერტო დე ძერბისთან თავიდან კარგი ურთიერთობა არ ჰქონია, თუმცა საბოლოოდ დე ძერბი მისთვის მამასავით გახდა და დაეხმარა, რომ ისეთ ფეხბურთელად ჩამოყალიბებულიყო, როგორადაც ვერც კი წარმოიდგენდა.
კოლუელი ინგლისის სხვადასხვა ასაკობრივ ნაკრებში თამაშობდა და ეროვნულ ნაკრებში დებიუტი 2023 წელს ჰქონდა. ის იმედოვნებს, რომ თომას ტუხელის პირველ შემადგენლობაში მოხვდება და კვლავ შეძლებს ქვეყნის ღირსების დაცვას.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს