კონტენდერ სერიის გამარჯვებული UFC-ში დებიუტამდე დოპინგის გამო შეაჩერეს

მძიმე წონითი დივიზიონის მებრძოლ დანილო ვოევოდკინს UFC-ის ოქტაგონზე ჯერ არც უჩხუბია, თუმცა უკვე დოპინგ სკანდალში გაეხვა. UFC-ის ანტი-დოპინგურმა პროგრამამ (Combat Sports Anti-Doping - CSAD) ხუთშაბათს გამოაცხადა, რომ ვოევოდკინმა, რომლის პროფესიონალური რეკორდია 7-0 MMA და 0-0 UFC, არასაშეჯიბრო პერიოდში ჩატარებული ტესტი ჩააგდო და ორწლიანი დისკვალიფიკაცია მიიღო. 17 ოქტომბერს აღებულ სინჯში აკრძალული პრეპარატი მელდონიუმი აღმოაჩნდა. CSAD-ის განცხადებით, მელდონიუმი მიეკუთვნება "ჰორმონებისა და მეტაბოლური მოდულატორების კლასს, რომელიც აკრძალულია ნებისმიერ დროს". “CSAD-მა ასევე დაადგინა, რომ მოცემულ შემთხვევაში არ არსებობს შემამსუბუქებელი გარემოება, რომელიც სტანდარტული 24-თვიანი სანქციის შემცირებას გამოიწვევდა. მელდონიუმი არასპეციფიკური ნივთიერებაა UFC-ის ანტი-დოპინგური პროგრამის ფარგლებში”, – ნათქვამია CSAD-ის ოფიციალურ განცხადებაში. 24 წლის უკრაინელ მებრძოლს UFC-ის კონტრაქტი ერთი თვის წინ დანა უაითის კონტენდერის სერიაზე ბეილი შონფელდერზე სწრაფი ნოკაუტით გამარჯვების შემდეგ შესთავაზეს. ვოევოდკინი რინგზე დაბრუნებას 2026 წლის 10 ნოემბერს შეძლებს - დისკვალიფიკაციის ვადის გასვლიდან ორი წლის შემდეგ.