კრივი შესაძლოა 2028 წლის ლოს-ანჯელესის ოლიმპიურ თამაშებზე დაბრუნდეს

კრივი, რომელიც 1904 წლიდან თითქმის ყველა ოლიმპიურ თამაშებზე იყო წარმოდგენილი, გარდა 1912 წლისა, შესაძლოა 2028 წელს ლოს-ანჯელესში მაინც ვიხილოთ. საერთაშორისო ოლიმპიური კომიტეტის აღმასრულებელმა საბჭომ რეკომენდაცია გასცა, რომ კრივი შეტანილ იქნას 2028 წლის თამაშების პროგრამაში. თავდაპირველად, 2022 წელს გამოცხადებულ პროგრამაში კრივი არ იყო გათვალისწინებული, თუმცა, ცოტა ხნის წინ, ორგანიზაცია "მსოფლიო კრივს" მიენიჭა დროებითი აღიარება, როგორც სპორტის საერთაშორისო მმართველ ორგანოს. აღნიშნული რეკომენდაცია ჯერ კიდევ დასამტკიცებელია საერთაშორისო ოლიმპიური კომიტეტის მიერ საბერძნეთში მიმდინარე სესიაზე, თუმცა, კომიტეტის პრეზიდენტი, თომას ბახი, დარწმუნებულია, რომ მას მხარს დაუჭერენ. მისი თქმით, "მსოფლიო კრივის" დროებითი აღიარების შემდეგ, შესაძლებელი გახდა ამ გადაწყვეტილების მიღება. ახალი გლობალური ორგანოს შექმნა იყო მთავარი წინაღობა სპორტის მომავალ თამაშებში ჩართვისთვის. საერთაშორისო ოლიმპიურმა კომიტეტმა კრივის ტურნირები ბოლო ორ ოლიმპიადაზე თავად ჩაატარა, მას შემდეგ, რაც 2019 წელს საერთაშორისო კრივის ასოციაცია (IBA) მმართველობის, ფინანსების, მსაჯობისა და ეთიკური საკითხების გამო შეაჩერეს. მოგვიანებით, 2023 წლის ივნისში, რუსეთის მიერ მართულ IBA-ს სტატუსი რეფორმების განუხორციელებლობის გამო ჩამოერთვა. საერთაშორისო ოლიმპიური კომიტეტი და IBA შარშანდელი პარიზის ოლიმპიადის დროს ორ მოკრივეს, ალჟირელ იმანე ხელიფსა და ტაივანელ ლინ იუ-ტინგის მონაწილეობასთან დაკავშირებით დაუპირისპირდნენ. IBA-მ სპორტსმენები 2023 წლის მსოფლიო ჩემპიონატის შუა პერიოდში გენდერული კუთვნილების ტესტების ჩაუვლელობის გამო მოხსნა, თუმცა, საერთაშორისო ოლიმპიურმა კომიტეტმა მათ შეჯიბრებაში მონაწილეობის უფლება მისცა და ორივემ თავიანთ წონით კატეგორიებში ოქროს მედლები მოიპოვა. "მსოფლიო კრივი" 2023 წლის აპრილში შეიქმნა და ამჟამად 84 წევრი ჰყავს ხუთ კონტინენტზე, მათ შორის დიდ ბრიტანეთში. საერთაშორისო ოლიმპიურმა კომიტეტმა განაცხადა, რომ "მსოფლიო კრივმა" დროებითი აღიარებისთვის რამდენიმე საკვანძო კრიტერიუმი დააკმაყოფილა. "მსოფლიო კრივის" პრეზიდენტმა, ბორის ვან დერ ვორსტმა, მიესალმა ამ გადაწყვეტილებას და აღნიშნა, რომ ეს მნიშვნელოვანი ნაბიჯია ოლიმპიური კრივისთვის და სპორტი ოლიმპიურ პროგრამაში დაბრუნებასთან უფრო ახლოს მიიყვანა. საერთაშორისო ოლიმპიური კომიტეტის განცხადებით, ლოს-ანჯელესის თამაშებში მონაწილეობას მხოლოდ ის სპორტსმენები შეძლებენ, რომელთა ეროვნული ფედერაციებიც "მსოფლიო კრივის" წევრები იქნებიან 2028 წლის ოლიმპიადის საკვალიფიკაციო ეტაპის დაწყების მომენტისთვის. საკვალიფიკაციო პერიოდის თარიღები ჯერჯერობით უცნობია.