"მილუოლის" მეკარეს, ლიამ რობერტსს, "კრისტალ პალასის" თავდამსხმელ ჟან-ფილიპ მატეტაზე განხორციელებული სახიფათო თამაშისთვის დაწესებული სამმატჩიანი დისკვალიფიკაცია ექვს მატჩამდე გაუხანგრძლივდა. ინციდენტი ინგლისის ასოციაციის თასის მეხუთე რაუნდის შეხვედრაში მოხდა, როდესაც რობერტსმა მატეტას თავში ფეხი ჩაარტყა, ბურთის მოგერიების მცდელობისას.
მატეტას, რომელსაც მოედანზე ჟანგბადი დასჭირდა, მარცხენა ყურზე სერიოზული ჭრილობა აღენიშნებოდა, რის გამოც 25 ნაკერის დადება გახდა საჭირო. მსაჯმა მაიკლ ოლივერმა თავდაპირველად ეპიზოდი უყურადღებოდ დატოვა, თუმცა ვიდეო ასისტენტი მსაჯის (VAR) ჩარევის შემდეგ რობერტსი მოედნიდან გააძევეს.
ფეხბურთის ასოციაციამ (FA) განაცხადა, რომ თავდაპირველი სასჯელი "აშკარად არასაკმარისი" იყო და სადისციპლინო კომიტეტს მისი გაზრდის მოთხოვნით მიმართა. შედეგად, რობერტსს მოუწევს გამოტოვოს ექვსი მატჩი და მოედანზე დაბრუნებას მხოლოდ 8 აპრილს შეძლებს, როდესაც "მილუოლი" "შეფილდ იუნაიტედს" დაუპირისპირდება.
ინციდენტის შემდეგ რობერტსმა განაცხადა, რომ მის მიმართ "წარმოუდგენელი რაოდენობის შეურაცხმყოფელი შეტყობინებები და მუქარები" იყო. "კრისტალ პალასის" თავმჯდომარემ სტივ პერიშმა მომხდარი "ყველაზე თავხედურ დარღვევად" შეაფასა, ხოლო "არწივების" მწვრთნელმა ოლივერ გლასნერმა მას "საშინელი ფოლი" უწოდა. "მილუოლის" მთავარმა მწვრთნელმა ალექს ნილმა თამაშის შემდეგ ფეხბურთელი დაიცვა და განაცხადა, რომ დარღვევა განზრახ არ ყოფილა.
რობერტსმა მომხდარის გამო ბოდიში მოიხადა და განაცხადა, რომ მომხდარით "გულგატეხილია". მან აღნიშნა, რომ დაუყოვნებლივ დაუკავშირდა ჟან-ფილიპს და ბოდიში მოუხადა, რაზეც მადლობა მიიღო და დაარწმუნეს, რომ არ ინერვიულოს.
ფეხბურთის ასოციაციამ განაცხადა, რომ სტანდარტული სასჯელი აშკარად არასაკმარისი იყო და ლიამ რობერტსმა ეს არ აღიარა. სხდომის შემდეგ, სადისციპლინო კომიტეტმა დააკმაყოფილა FA-ს მოთხოვნა, გააუქმა სტანდარტული სამმატჩიანი სასჯელი და მის ნაცვლად ექვსმატჩიანი დისკვალიფიკაცია დააწესა.
რობერტსი "მილუოლის" სათადარიგო მეკარე იყო სეზონის უმეტესი ნაწილის განმავლობაში. მან მხოლოდ ორ ჩემპიონატის მატჩში მიიღო მონაწილეობა, ძირითადი მეკარის, ლუკას იენსენის იანვარში მიღებული ტრავმის შემდეგ.
ვარაუდობენ, რომ მატეტა საერთაშორისო შესვენების შემდეგ დაბრუნდება მოედანზე, როდესაც "პალასი" "ფულჰემს" დაუპირისპირდება. გლასნერის თქმით, თავდამსხმელი მომავალ კვირას ესპანეთში გაემგზავრება სავარჯიშოდ. 27 წლის ფეხბურთელი "პალასის" საუკეთესო ბომბარდირია 12 გოლით 27 მატჩში.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს