გავრცელებული ინფორმაციით, მადრიდის "რეალი" აქტიურად მუშაობს "ლივერპულის" მცველის, ტრენტ ალექსანდერ-არნოლდის საკუთარ რიგებში გადაყვანაზე. მოთამაშეს "ლივერპულთან" კონტრაქტი მიმდინარე წლის ივნისის ბოლოს ეწურება და ესპანური გრანდი ცდილობს, ინგლისელი ფეხბურთელი თავისუფალი აგენტის სტატუსით დაიმატოს.
მოლაპარაკებები საკმაოდ ინტენსიურად მიმდინარეობს, რადგან "რეალი" ცდილობს, ტრანსფერი რაც შეიძლება სწრაფად დაასრულოს და ალექსანდერ-არნოლდი მომავალი სეზონისთვის გუნდში ჰყავდეს. მიუხედავად იმისა, რომ საბოლოო შეთანხმება ჯერ არ მიღწეულა, მხარეები ტრანსფერის დასრულებასთან ახლოს არიან.
ცნობილია, რომ "რეალი" 26 წლის ფეხბურთელს უკვე ორი წელია აკვირდება და მის დამატებას პრიორიტეტულ ამოცანად მიიჩნევს. ალექსანდერ-არნოლდმა მთელი საკლუბო კარიერა "ლივერპულში" გაატარა, სადაც 300-ზე მეტი მატჩი ითამაშა და გუნდის ვიცე-კაპიტანია. მან "ლივერპულის" შემადგენლობაში ყველა მნიშვნელოვანი ტიტული მოიგო.
ბოლო პერიოდში, ალექსანდერ-არნოლდსა და "ლივერპულის" გულშემატკივრებს შორის ურთიერთობა გარკვეულწილად დაიძაბა. ფეხბურთელმა რამდენჯერმე გააკეთა განცხადება, რომ უფრო მეტად "ოქროს ბურთის" მოგება სურს, ვიდრე "ლივერპულთან" ერთად ჩემპიონთა ლიგის მოგება, რამაც გულშემატკივრების უკმაყოფილება გამოიწვია.
თუ ალექსანდერ-არნოლდი მართლაც გადავა "რეალში", ის სტივ მაკმანამანის გზას გაიმეორებს, რომელმაც ასევე თავისუფალი აგენტის სტატუსით დატოვა "ლივერპული" და 1999 წელს მადრიდულ კლუბს შეუერთდა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს