მაიკლ შინი ბავშვებთან უსახლკარობის პრობლემის განხილვას იმედოვნებს

ცნობილმა ჰოლივუდელმა მსახიობმა, მაიკლ შინმა განაცხადა, რომ მისი ახალი საბავშვო წიგნი მომავალ თაობას უსახლკარობის საკითხზე საუბრის წამოწყებაში დაეხმარება. შინი წარმოადგენს წიგნს სახელწოდებით "სახლი დრაკონ სპარკისთვის", რომელიც მოგვითხრობს დრაკონის შესახებ, რომელმაც დაკარგა საკუთარი სახლი და ახლის ძიებაში გაემგზავრა. მსახიობი იმედოვნებს, რომ ეს წიგნი ბავშვებს მომავალში ცვლილებების შეტანის გზებზე დააფიქრებს. შინის თქმით, ის ყოველთვის თვლიდა, რომ ისტორიების მოყოლა მნიშვნელოვანი გზაა სამყაროში ცვლილებების შესატანად, განსაკუთრებით კი საბავშვო ისტორიებს შეუძლიათ ყველაზე დიდი გავლენის მოხდენა.

წიგნი ჯეს ვებთან თანაავტორობით და სარა მასინის ილუსტრაციებით გამოიცა. მისი გაყიდვიდან შემოსული თანხის ნაწილი უსახლკაროთა საქველმოქმედო ორგანიზაცია "თავშესაფარს" გადაეცემა. 56 წლის შინი აღნიშნავს, რომ თავს იღბლიანად თვლის, რადგან უსაფრთხო და ბედნიერ სახლში გაიზარდა, თუმცა იმის გაცნობიერება, რომ ბევრისთვის ეს ასე არ არის, სულ უფრო მეტად აღძრავს მას დახმარების სურვილს. ის იმედოვნებს, რომ ბავშვებს სიამოვნებით წაიკითხავენ სპარკ დრაკონისა და მისი მეგობარი ცხოველების შესახებ, რომლებიც "ჯადოსნურ ტყის სამყაროში" ცხოვრობენ და ახალი სახლის საძიებლად მიემგზავრებიან.

მსახიობი გამოთქვამს იმედს, რომ სპარკის თავგადასავალი სახალისო საკითხავი იქნება და ამავდროულად, მისი ისტორია ახალგაზრდა მკითხველს უსახლკარობის არსზე დააფიქრებს და ცვლილებების შეტანის გზებზე საუბრის წამოწყებაში დაეხმარება. უელსელმა მსახიობმა აღნიშნა, რომ ამაყობს წიგნის "თავშესაფართან" პარტნიორობით გამოცემით, რაც ხელს შეუწყობს მათ მნიშვნელოვან საქმიანობას საბინაო კრიზისის წინააღმდეგ ბრძოლაში. გამომცემლობა "პაფინი" და შინი თითოეული მყარი ყდის წიგნიდან 1 ფუნტს, ხოლო რბილი ყდის წიგნიდან 50 პენს "თავშესაფარს" გადასცემენ. საქველმოქმედო ორგანიზაციის მონაცემებით, ინგლისში 164 000-ზე მეტი ბავშვი უსახლკაროა და დროებით საცხოვრებელში ცხოვრობს. მათივე ინფორმაციით, ეს მაჩვენებელი მხოლოდ ერთ წელიწადში 21 650-ით (15%-ით) გაიზარდა.

შინის მონაწილეობა აქვს მიღებული ისტორიულ ფილმებში, სადაც განასახიერა ისეთი პიროვნებები, როგორებიც არიან საფეხბურთო კლუბების მწვრთნელი ბრაიან კლაფი, დიდი ბრიტანეთის ყოფილი პრემიერ-მინისტრი ტონი ბლერი და კომიკოსი კენეტ უილიამსი. ბოლო დროს მსახიობი გამოჩნდა დოკუმენტურ გადაცემაში "მაიკლ შინის საიდუმლო მილიონი ფუნტის გაჩუქება", სადაც საკუთარი ფულით 900 ადამიანს 1 მილიონი ფუნტის ოდენობის ვალი გაუსტუმრა. იანვარში შინმა გამოაცხადა ახალი თეატრალური კომპანიის დაფინანსების შესახებ, რომელიც უელსის ეროვნული თეატრის დახურვით გამოწვეულ ვაკუუმს შეავსებს. ის უელსის ეროვნული თეატრის სამხატვრო ხელმძღვანელი იქნება და თეატრი მიზნად ისახავს "დიდი ისტორიების მოყოლას დიდ სცენებზე დიდი აუდიტორიისთვის".