იტალიის ქალაქ ნეაპოლსა და მის შემოგარენში მცხოვრებმა უამრავმა ადამიანმა ღამე ქუჩებსა და ავტომობილებში გაატარა. მიზეზი მიწისძვრა გახდა, რომელმაც შენობები შეაზანზარა და ნანგრევები წარმოქმნა.
იტალიელი სეისმოლოგების განცხადებით, 4.4 მაგნიტუდის ბიძგები ადგილობრივი დროით ხუთშაბათს, 01:25 საათზე დაფიქსირდა. ეპიცენტრი ზედაპირთან ახლოს, დაახლოებით სამი კილომეტრის სიღრმეზე იყო.
ნეაპოლის ზოგიერთ რაიონში ელექტროენერგიის მიწოდება შეფერხდა.
მიწისძვრის ეპიცენტრთან ახლოს მდებარე ქალაქ პოცუოლიში, ნაწილობრივ დანგრეული სახლის ნანგრევებიდან ერთი დაშავებული ამოიყვანეს.
აღსანიშნავია, რომ ნეაპოლი ფლეგრეის ველებზე მდებარეობს, რაც სამხრეთ იტალიის ამ რეგიონს მიწისძვრებისადმი მიდრეკილს ხდის.
იტალიური მედიის ცნობით, ხუთშაბათის მიწისძვრა კამპანიის რეგიონის რამდენიმე რაიონში იგრძნობოდა. ბიძგებს სულ მცირე ორი შედარებით სუსტი განმეორებითი ბიძგი მოჰყვა.
მოსახლეობა სახლებიდან გამოდის და ნეაპოლის ქუჩებში იკრიბება, რადგან განმეორებითი ბიძგების ეშინიათ. გავრცელებულ ფოტოებზე ჩანს დაზიანებული სახლი და დაზიანებული ავტომობილი.
ზარალის შესაფასებლად სამაშველო კოორდინაციის ცენტრი შეიქმნა.
გაზეთ Corriere Della Sera-ს ინფორმაციით, პოცუოლისა და მიმდებარე ორი რაიონის სკოლები ხუთშაბათს დაიხურება, რათა შენობების მდგრადობის შემოწმება მოხდეს.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს