რუსეთის ოფიციალური პირების განცხადებით, მოსკოვსა და მოსკოვის ოლქზე ღამით განხორციელდა მასირებული თავდასხმა უპილოტო საფრენი აპარატებით, რის შედეგადაც, სულ მცირე, ერთი ადამიანი დაიღუპა და სამი დაშავდა. მოსკოვის ოლქის გუბერნატორის, ანდრეი ვორობიოვის თქმით, მსხვერპლი და დაშავებულები არიან დედაქალაქის სიახლოვეს მდებარე ქალაქებში - ვიდნოესა და დომოდედოვოში. საცხოვრებელი კორპუსის შვიდი ბინა დაზიანდა. მოსკოვის მერის, სერგეი სობიანინის განცხადებით, ქალაქის მიმართულებით მომავალი 73 დრონი ჩამოაგდეს. ერთ-ერთი შენობის სახურავი დრონის ნამსხვრევებმა დააზიანა.
ამ თავდასხმის შემდეგ, ერთ-ერთი რაიონის მატარებლების მოძრაობა შეჩერებულია და მოსკოვის აეროპორტებში ფრენები შეზღუდულია. ეს არის ერთ-ერთი ყველაზე მასშტაბური თავდასხმა მას შემდეგ, რაც რუსეთმა უკრაინაში სრულმასშტაბიანი შეჭრა დაიწყო 2022 წლის თებერვალში.
თავდასხმა მოხდა აშშ-ისა და უკრაინის წარმომადგენლებს შორის საუდის არაბეთში დაგეგმილ მნიშვნელოვან შეხვედრამდე რამდენიმე საათით ადრე, რომელიც რუსეთსა და უკრაინას შორის ომის დასრულებას ეძღვნება.
გუბერნატორმა ვორობიოვმა სოციალურ ქსელში გამოაქვეყნა ფოტოები, რომლებზეც სავარაუდოდ ჩანს დაზიანებული ბინები და მოსკოვის ოლქში მდებარე ავტოსადგომზე დამწვარი ავტომობილები. მისი თქმით, ღამის თავდასხმის შემდეგ დაზიანებული ბინებიდან 12 ადამიანის, მათ შორის სამი ბავშვის ევაკუაცია გახდა საჭირო.
ფრენების შეზღუდვა დაწესდა მოსკოვის შერემეტიევოს, დომოდედოვოსა და ვნუკოვოს აეროპორტებში, რომლებიც ყოველწლიურად მილიონობით მგზავრს ემსახურება.
რუსეთის თავდაცვის სამინისტროს ინფორმაციით, ღამით მოსკოვსა და რუსეთის ცხრა სხვა რეგიონში ჯამში 337 უკრაინული დრონი იქნა ან ჩამოგდებული, ან განადგურებული.
უკრაინას ამ საკითხზე კომენტარი ჯერ არ გაუკეთებია.
ამავე ღამეს, უკრაინელმა ოფიციალურმა პირებმა განაცხადეს რუსეთის მხრიდან დრონებით კიევზე და სხვა რეგიონებზე თავდასხმის შესახებ. დაუყოვნებლივ არ გახდა ცნობილი, იყო თუ არა მსხვერპლი.
_97.webp)
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს