მოტო GP-ის ჩემპიონი მარტინი შესაძლოა პირველ ოთხ რბოლას გამოტოვებდეს

მოტო GP-ის მსოფლიო ჩემპიონი, ხორხე მარტინი აცხადებს, რომ ოპერაციის შემდგომი რეაბილიტაციის გამო, შესაძლოა ჩემპიონატის მეხუთე ეტაპამდე ვერ შეძლოს ასპარეზობას. 27 წლის ესპანელმა სპორტსმენმა ტაილანდში გამართული პირველი რბოლა გამოტოვა, რაც სეზონისწინა ტესტირებისას მიღებული ხელისა და ფეხის მოტეხილობებმა გამოიწვია. უახლოესი გრან-პრი არგენტინაში ამ შაბათ-კვირას გაიმართება, რასაც მარტის ბოლოს ამერიკის გრან-პრი ოსტინში მოჰყვება, ხოლო მეოთხე ეტაპი 11-13 აპრილს ყატარშია დაგეგმილი. მარტინის თქმით, ის ძალიან განიცდის შექმნილ ვითარებას და გამოჯანმრთელებას იმაზე ნელა ახერხებს, ვიდრე სურს. მან ასევე აღნიშნა, რომ ოსტინში მონაწილეობას ვერ მიიღებს, თუმცა ყატარში ასპარეზობის საკითხი ჯერ კიდევ ღიაა. სპორტსმენი ხაზს უსვამს, რომ რბოლაში დაბრუნებამდე აუცილებლად სურს ტესტირების გავლა, რადგან თავს კარგად არ გრძნობს. ცნობილია, რომ მისი გუნდის ხელმძღვანელობა ამ საკითხზე მუშაობს. შეგახსენებთ, რომ მარტინმა, რომელმაც შარშან მოტო GP-ის მსოფლიო ჩემპიონის ტიტული მოიპოვა, სეზონისწინა ტესტირების პირველ დღეს მარჯვენა ხელის მოტეხილობის გამო ოპერაცია უკვე გადაიტანა. ტაილანდში გამართული პირველი ეტაპის შემდეგ, ექვსგზის ჩემპიონი მარკ მარკესი ლიდერობს. მარტინი შესაძლოა ესპანეთში, საკუთარ გრან-პრიზე დაბრუნდეს, რომელიც 25 აპრილს დაიწყება.