NBA-ის ხელფასების ზღვარი მნიშვნელოვნად იზრდება

2025-26 წლების სეზონისთვის NBA-ის ხელფასების ზედა ზღვარი 10 პროცენტით გაიზრდება. ეს ზრდა ნიშნავს, რომ მომავალ სეზონში გუნდებს ხელფასებში 154.6 მილიონი დოლარის დახარჯვა შეეძლებათ, რაც ამ სეზონის 140.6 მილიონიან მაჩვენებელზე მეტია. ფუფუნების გადასახადი 187.9 მილიონი დოლარიდან დაიწყება, პირველი ზღვარი 195.9 მილიონ დოლარზეა განსაზღვრული, ხოლო მეორე ზღვარი - 207.8 მილიონ დოლარზე. გუნდები, რომლებმაც მიმდინარე სეზონში ფუფუნების გადასახადის თავიდან არიდება მოახერხეს, 10 გადამხდელი გუნდისგან ჯამში 11.5 მილიონ დოლარს მიიღებენ. ამჟამად, “ბრუკლინ ნეთსი” ერთადერთი გუნდია ლიგაში, რომელსაც ხელფასების ჭერში იმდენი თავისუფალი ადგილი აქვს, რომ მაქსიმალური კონტრაქტის შეთავაზება შეძლოს. “დეტროიტ პისტონსი” ამ მაჩვენებლით მეორე ადგილზეა. რიგი გუნდები ცდილობენ ხელფასების ჭერში მოქცევას. მათ შორის არის “ფინიქს სანზი”, რომელიც ზაფხულში შემადგენლობის შეცვლას გეგმავს, რათა მეორე ზღვარს თავი აარიდოს. მოლოდინების გაუმართლებლობის გამო, მიმდინარე სეზონი “სანზისთვის” წარუმატებელი გამოდგა. გუნდმა კევინ დურანტი გაცვალა და მოსალოდნელია, რომ ზაფხულში კიდევ არაერთი ცვლილება განხორციელდება. ყურადღება უნდა მიექცეს “მილუოკისაც”. დემიენ ლილარდის ტრავმის სიმძიმიდან გამომდინარე, გუნდს შესაძლოა ზაფხულში რთული გადაწყვეტილებების მიღება მოუწიოს. თუმცა, აღსანიშნავია, რომ “მილუოკიმ” კრის მიდლტონის “ვაშინგტონ ვიზარდსში” გაცვლით მეორე ზღვრის თავიდან არიდება მოახერხა. გუნდების მფლობელებს შესაძლოა გადასახადების კიდევ უფრო შემცირება სურდეთ, თუ ვერ ხედავენ რეალურ პერსპექტივას ჩემპიონობისთვის ბრძოლაში ჩართვისა. მიუხედავად იმისა, რომ ამ და, სავარაუდოდ, მომავალ სეზონში ცვლილებები არ იგეგმება, “ბოსტონ სელტიქსი” გადასახადების მნიშვნელოვან ზრდას ელოდება. გარდა ამისა, გუნდის გაყიდვის პროცესი დასრულდა და მალე ახალი მფლობელები გამოჩნდებიან. ჯეისონ ტატუმმა გასულ ზაფხულს 314 მილიონი დოლარის ღირებულების ხუთწლიანი კონტრაქტი გააფორმა, ხოლო ჯეილენ ბრაუნმა - წინა ზაფხულს 304 მილიონი დოლარის ღირებულების ანალოგიური კონტრაქტი. “სელტიქსის” ამჟამინდელმა მფლობელმა, უაიკ გროუსბეკმა ცოტა ხნის წინ განაცხადა, რომ ცვლილებები გარდაუვალია. “მეორე ზღვარს ვერავინ გაუძლებს,” - განაცხადა გროუსბეკმა. “ვწინასწარმეტყველებ, რომ მომდევნო 40 წლის განმავლობაში, CBA-ის ფარგლებში, ვერცერთი გუნდი ვერ შეძლებს მეორე ზღვარზე ორ წელზე მეტხანს დარჩენას.”