"ნიუკასლ იუნაიტედის" ცენტრალური მცველი, სვენ ბოტმანი, მუხლის მორიგი ტრავმის გამო, დაახლოებით რვა კვირის განმავლობაში ვერ შეძლებს თამაშს. ამის შესახებ გუნდის მთავარმა მწვრთნელმა, ედი ჰაუმ განაცხადა.
25 წლის ბოტმანი მოედანს 2024 წლის მარტში მიღებული მუხლის ჯვარედინი მყესების გაწყვეტის შემდეგ, 10-თვიანი პაუზის შემდეგ იანვარში დაუბრუნდა, თუმცა ახლა მეორე მუხლი აქვს დაზიანებული. ნიდერლანდების ნაკრების ფეხბურთელმა, რომელმაც ამ სეზონში მხოლოდ ხუთ მატჩში მიიღო მონაწილეობა, მუხლის ახალი ტრავმის გამო "ნიუკასლის" ბოლო ხუთი შეხვედრა გამოტოვა.
პრობლემის მოსაგვარებლად ოპერაციაა საჭირო, რის გამოც ბოტმანი დაახლოებით ორი თვით ვერ ითამაშებს. ჰაუს თქმით, ისინი ცდილობდნენ ბოტმანის სრული ფიზიკური კონდიციის აღდგენას და ის ძალიან ახლოს იყო 2 მარტის "ბრაიტონის" წინააღმდეგ თამაშთან, მაგრამ წინა დღეს მუხლში კვლავ იგრძნო დისკომფორტი. ამ კვირაში მას იგივე დისკომფორტი აწუხებდა, ამიტომ, როგორც ჩანს, ოპერაციის გაკეთება მოუწევს. მას მცირე ოპერაცია დასჭირდება სითხის მოსაშორებლად და შემდეგ კვლავ კარგად იქნება.
ბოტმანი შეუერთდა მცველ ლუის ჰოლსა და თავდამსხმელ ენტონი გორდონს იმ მოთამაშეთა სიას, რომლებიც ვერ მიიღებენ მონაწილეობას ლიგის თასის ფინალში "ლივერპულის" წინააღმდეგ, რომელიც 16 მარტს გაიმართება. ჰოლი ფეხის ტრავმის გამო სეზონის ბოლომდე გამოეთიშა თამაშს. გორდონი კი "ბრაიტონის" წინააღმდეგ ინგლისის თასის მეხუთე რაუნდის მატჩში გააძევეს მოედნიდან, რადგან ხელით შეეხო მცველ იან პაულ ვან ჰეკეს სახეს. "ევერტონის" ყოფილმა გარემარბმა უემბლიზე გასამართ ფინალში თამაშის უფლება დაკარგა, რადგან "ნიუკასლმა" მისი გაძევების გასაჩივრება არ ისურვა. ჰაუს თქმით, ენტონის განზრახვა არ ჰქონია ვინმესთვის ზიანის მიყენება, მაგრამ უნდა შეფასდეს, არსებობს თუ არა წარმატების შანსი და თუ ასეთი შანსი არ არის, გასაჩივრებას აზრი არ აქვს, რასაც ენტონიც ხვდება.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს