პოლონეთი მიგრანტებისთვის თავშესაფრის მოთხოვნის უფლების შეჩერებას გეგმავს

პოლონეთის მთავრობა, პრემიერ-მინისტრ დონალდ ტუსკის ხელმძღვანელობით, დროებით შეაჩერებს იმ მიგრანტების უფლებას, რომლებიც ბელარუსის საზღვრიდან პოლონეთში ჩადიან, თავშესაფრის მოთხოვნაზე. აღნიშნული გადაწყვეტილება მიღებულ იქნა მას შემდეგ, რაც პრეზიდენტმა ანდჟეი დუდამ ხელი მოაწერა საკამათო კანონპროექტს, რომელიც პოლონეთის ხელისუფლებას უფლებას აძლევს, 60 დღემდე ვადით შეაჩეროს ეს უფლება.

პრემიერ-მინისტრმა ტუსკმა განაცხადა, რომ მთავრობა კანონს დაუყოვნებლივ აამოქმედებს, ხოლო პრეზიდენტმა დუდამ აღნიშნა, რომ ცვლილებები ქვეყნის საზღვრების უსაფრთხოების გაძლიერებას ემსახურება.

თუმცა, კანონს აკრიტიკებენ უფლებადამცველი ორგანიზაციები, მათ შორის Human Rights Watch, რომელიც მოუწოდებს ევროკავშირს, მიიღოს სამართლებრივი ზომები პოლონეთის წინააღმდეგ, თუ კანონი ამოქმედდება. ორგანიზაციის განცხადებით, კანონპროექტი ეწინააღმდეგება პოლონეთის საერთაშორისო და ევროკავშირის ვალდებულებებს და შესაძლოა, პოლონეთ-ბელარუსის საზღვარი სრულად ჩაკეტოს, სადაც პოლონეთის ხელისუფლება უკვე ახორციელებს უკანონო და ძალადობრივ უკან გაბრუნებებს.

მთავრობის განცხადებით, შეჩერება დროებით შეეხება მხოლოდ იმ პირებს, რომლებიც საფრთხეს უქმნიან სახელმწიფო უსაფრთხოებას, მაგალითად, აგრესიულ მიგრანტთა დიდ ჯგუფებს, რომლებიც ცდილობენ საზღვრის გარღვევას. გამონაკლისი დაიშვება არასრულწლოვანთათვის, ორსულებისთვის, ხანდაზმულთათვის ან ავადმყოფებისთვის, ასევე მათთვის, ვინც უკან დაბრუნების შემთხვევაში "სერიოზული ზიანის რეალური რისკის" ქვეშ არიან და იმ ქვეყნების მოქალაქეებისთვის, რომლებიც მიგრაციის ინსტრუმენტალიზებაში არიან დადანაშაულებულნი, მაგალითად, ბელარუსი.

ტუსკმა უარყო უფლებადამცველი ჯგუფების კრიტიკა და განაცხადა, რომ საუბარი არ არის ადამიანის უფლებების დარღვევაზე ან თავშესაფრის უფლებაზე, არამედ იმაზე, რომ არ დაკმაყოფილდეს იმ ადამიანების განაცხადები, რომლებიც საზღვარს უკანონოდ კვეთენ ლუკაშენკოს მიერ ორგანიზებულ ჯგუფებში.

2021 წლიდან პოლონეთმა, ლიეტუვამ, ლატვიამ და ფინეთმა უკანონოდ ბელარუსიდან და რუსეთიდან ქვეყნებში შემსვლელთა რაოდენობის მკვეთრი ზრდა დააფიქსირეს. პოლონეთის ხელისუფლებამ ათასობით ჯარისკაცი და მესაზღვრე გაგზავნა ბელარუსთან საზღვრის გასაკონტროლებლად და 186 კმ-ზე ააგო 5,5 მეტრის სიმაღლის ფოლადის ღობე, სადაც დროდადრო რამდენიმე ათასი მიგრანტი რჩება ჩარჩენილი.

უფლებადამცველი ჯგუფების შეფასებით, 2021 წლიდან ბელარუსის, პოლონეთის, ლიეტუვისა და ლატვიის საზღვრებზე ასზე მეტი ადამიანი დაიღუპა. ევროკავშირის აღმოსავლეთ ფლანგის ქვეყნები და ევროკომისია ბელარუსის და რუსეთის ხელისუფლებას ადანაშაულებენ მიგრაციის იარაღად გამოყენებაში, რათა ევროკავშირში ახალი მარშრუტი შექმნან და ბლოკის დესტაბილიზაცია მოახდინონ.