Qualcomm Snapdragon X Elite ყველა ფორმ-ფაქტორის კომპიუტერისთვის იქნება ხელმისაწვდომი

Qualcomm-ის პრეზიდენტმა და აღმასრულებელმა დირექტორმა, კრისტიანო ამონმა Computex-ის გამოფენაზე განაცხადა, რომ სტანდარტული ლეპტოპები მხოლოდ პირველი ეტაპია იმ Windows კომპიუტერებში, რომლებიც აღჭურვილი იქნება Snapdragon X Elite ჩიპებით. კომპანიამ წარმოადგინა კომპიუტერების რენდერები, სადაც ეს ჩიპებია ინტეგრირებული. ამონის განცხადებით, Snapdragon X Elite ყველა ფორმ-ფაქტორის პერსონალურ კომპიუტერში იქნება ინტეგრირებული. სლაიდზე ნაჩვენები იყო პლანშეტური კომპიუტერების დიზაინები, ასევე მინი-კომპიუტერისა და All-in-One კომპიუტერების მსგავსი მოწყობილობები. ამონს არ დაუკონკრეტებია, თუ რომელი მწარმოებლები გამოუშვებენ ამ ფორმ-ფაქტორების მოწყობილობებს, ან როდის უნდა ველოდოთ მათ გამოჩენას ბაზარზე. სავარაუდოდ, დამატებითი ინფორმაცია ცნობილი გახდება კომპანიის ყოველწლიურ ტექნიკურ სამიტზე, რომელიც ტრადიციულად ოქტომბერში იმართება. Qualcomm-მა უკვე დაიწყო Windows 11-ზე მომუშავე Snapdragon X Elite პერსონალური კომპიუტერების წინასწარი შეკვეთების მიღება. მაისის ბოლოს კომპანიამ წარმოადგინა Snapdragon for Windows-ის დეველოპერთა პაკეტი. ის განკუთვნილია პროგრამული უზრუნველყოფის დეველოპერებისთვის, რომლებსაც ესაჭიროებათ Windows 11-ისთვის ახალი აპლიკაციების შექმნა, ან არსებული აპლიკაციების პორტირება, რათა მათ გამართულად იმუშაონ Arm არქიტექტურაზე დაფუძნებულ Snapdragon X Elite და Plus ჩიპებზე. პრეზენტაციისას ამონმა აღნიშნა, რომ აღნიშნულ პაკეტზე დიდი მოთხოვნაა.