რომის პაპის ჯანმრთელობის მდგომარეობა უმჯობესდება

ვატიკანის განცხადებით, რომის პაპი ფრანცისკე, რომელიც სამ კვირაზე მეტია პნევმონიასა და ბრონქიტს ებრძვის, მკურნალობაზე დადებითად რეაგირებს. წმინდა საყდრის ინფორმაციით, პაპის კლინიკური მდგომარეობა ბოლო დღეების განმავლობაში სტაბილურია, რაც მკურნალობაზე კარგ პასუხს მიუთითებს. აღინიშნება მდგომარეობის თანდათანობითი, მცირე გაუმჯობესება. 88 წლის პონტიფიკოსმა შაბათ დილით რომის ჯემელის საავადმყოფოს სამლოცველოში ილოცა, სადაც ის მკურნალობას გადის. არგენტინელი პაპი საავადმყოფოში მოთავსების შემდეგ საზოგადოებაში არ გამოჩენილა, რაც მისი პაპობის 12 წლის განმავლობაში ყველაზე ხანგრძლივი პერიოდია საზოგადოების თვალთახედვიდან მოშორებით. ის 14 თებერვალს სუნთქვის გაძნელების გამო მოათავსეს საავადმყოფოში. თავდაპირველად მას ბრონქიტის დიაგნოზი დაუსვეს, მოგვიანებით კი ორმხრივი პნევმონია. პაპი განსაკუთრებით მოწყვლადია პნევმონიის მიმართ, ფილტვების ინფექციის მიმართ, რომელიც შეიძლება გამოწვეული იყოს ბაქტერიებით, ვირუსებით ან სოკოებით, რადგან ახალგაზრდობაში პლევრიტი ჰქონდა გადატანილი და ფილტვის ნაწილი ამოკვეთილი. ექიმების აზრით, მისი ასაკისა და სამედიცინო ისტორიის გათვალისწინებით, პაპს გამოჯანმრთელების ხანგრძლივი გზა ელის. 88 წლის პონტიფიკოსი საავადმყოფოში მოთავსების დღიდან, 14 თებერვლიდან, საზოგადოებას არ უნახავს და არც მისგან არაფერი სმენია. პაპი ფრანცისკე პირადად ვერ შეძლებს ტრადიციული ანგელუსის ლოცვის წაკითხვას, ამიტომ ვატიკანმა ტექსტი გამოაქვეყნა. მთელ მსოფლიოში პაპის მხარდასაჭერად ლოცვები და მსახურებები აღევლინება.