სამხრეთ აფრიკა აშშ-ის ზეწოლას არ უნდა დაემორჩილოს, აცხადებს ოპოზიცია ელჩის გარშემო ატეხილი აჟიოტაჟის ფონზე

სამხრეთ აფრიკული ოპოზიციური პარტიები მოუწოდებენ ქვეყნის პრეზიდენტს, არ დაუშვას ამერიკის შეერთებული შტატების მხრიდან ზეწოლა, მას შემდეგ რაც ვაშინგტონმა ელჩი ებრაჰიმ რასული პერსონა ნონ გრატად გამოაცხადა და ქვეყნის დატოვება 72 საათში მოსთხოვა.

რასულის არასასურველ პირად გამოცხადების მიზეზი გახდა აშშ-ის სახელმწიფო მდივნის, მარკო რუბიოს განცხადება, რომელშიც მან რასული "რასობრივი შუღლის გამღვივებელ პოლიტიკოსად" მოიხსენია, რომელსაც ამერიკა სძულს.

სამხრეთ აფრიკასა და შეერთებულ შტატებს შორის ურთიერთობა მას შემდეგ დაიძაბა, რაც აშშ-ის პრეზიდენტის პოსტი დონალდ ტრამპმა დაიკავა.

სამხრეთ აფრიკის საერთაშორისო ურთიერთობების მინისტრმა, რონალდ ლამოლამ სახელმწიფო მაუწყებელ SABC-ს განუცხადა, რომ "ტვიტერის დიპლომატიაში ჩართვა არ არის სასარგებლო" და ხაზი გაუსვა, რომ ორ ქვეყანას "პირისპირ" საუბარი სჭირდება.

სხვა პოლიტიკოსები უფრო მკაცრად გამოეხმაურნენ მომხდარს.

ჯულიუს მალემას ოპოზიციურმა პარტიამ, "ეკონომიკური თავისუფლების მებრძოლებმა" (EFF), მკაცრი განცხადება გაავრცელა აშშ-ის წინააღმდეგ და მოუწოდა სამხრეთ აფრიკის პრეზიდენტს, კირილ რამაფოსას, "არ დაუშვას ქვეყნის დაშინება თეთრი სახლის ფორთოხლისფერმა მასხარამ".

პან-აფრიკანისტური კონგრესის (PAC) გენერალურმა მდივანმა, აპა პოომ ასევე დაგმო აშშ-ის გადაწყვეტილება და მას სამხრეთ აფრიკის სუვერენიტეტზე თავდასხმად და ქვეყნის პოლიტიკაში ჩარევის მცდელობად შეაფასა.

"სამხრეთ აფრიკა აშშ-ის მარიონეტი არ არის, ჩვენ გვაქვს უფლება, ვმართოთ ჩვენი ქვეყანა ყოველგვარი ჩარევის გარეშე", - განაცხადა მან.

ტრამპი ხშირად აკრიტიკებდა სამხრეთ აფრიკის საკამათო მიწის კანონპროექტს, რომელიც მთავრობას გარკვეულ გარემოებებში კომპენსაციის გარეშე მიწის კონფისკაციის უფლებას აძლევს.

გასულ თვეში ტრამპმა სამხრეთ აფრიკისთვის დახმარების შემცირების გადაწყვეტილება მიიღო. მან განაცხადა, რომ ადგილი აქვს დისკრიმინაციას თეთრკანიანი აფრიკანერების უმცირესობის მიმართ, რომლებიც ჰოლანდიელი და ფრანგი დევნილების შთამომავლები არიან.

სამხრეთ აფრიკა ამ ბრალდებას უარყოფს.

რასული ადრე, 2010-დან 2015 წლამდე, აშშ-ში ელჩად მსახურობდა, როდესაც ბარაკ ობამა პრეზიდენტი იყო.

ის ელჩად ხელახლა 2024 წელს დაინიშნა, მისი წინა გამოცდილებისა და ვაშინგტონში არსებული ფართო კონტაქტების გამო.

თუმცა, მიუხედავად მისი გამოცდილებისა, მას ტრამპთან შეხვედრების დაგეგმვისას პრობლემები შეექმნა.

ერთმა ანონიმურმა სამხრეთ აფრიკელმა დიპლომატმა საინფორმაციო საიტ Semafor-ს განუცხადა, რომ ელჩის "პრო-პალესტინური პოლიტიკის ისტორიის" მქონე ადამიანი, სხვა საკითხებთან ერთად, "ამჟამად ამ თანამდებობაზე წარმატებას ვერ მიაღწევს".

"დემოკრატიულმა ალიანსმა" (DA) - ეროვნული ერთიანობის მთავრობის (GNU) კოალიციურმა პარტნიორმა - ეჭვი გამოთქვა, თუ რატომ ირჩევს უმსხვილესი პარტია, "აფრიკის ეროვნული კონგრესი" (ANC), კვლავაც ყველა თავის საგარეო დიპლომატს.

DA-ს სპიკერმა, ვილი აუკამპმა SABC-ს განუცხადა, რომ "უბრალოდ არ არის სწორი, რომ ANC-ს აქვს სრული თავისუფლება საგარეო პოლიტიკასა და დიპლომატების დანიშვნაში, მაშინ როდესაც ისინი მხოლოდ 39%-იან პარტიას წარმოადგენენ" და მოუწოდა GNU-ს წევრებს, ვაშინგტონში გაემგზავრონ დაძაბულობის შესამსუბუქებლად.