"საუთჰემპტონის" მთავარმა მწვრთნელმა, ივან იურიჩმა, განაცხადა, რომ მისი გუნდი პრემიერ ლიგას დატოვებს. ეს განცხადება მან "ვულვზთან" შინ წაგებული მატჩის შემდეგ გააკეთა. "საუთჰემპტონი" ამჟამად სატურნირო ცხრილში მე-17 ადგილზე მყოფ "ვულვზს" 17 ქულით ჩამორჩება და დარჩენილ ცხრა თამაშში ამ სხვაობის აღმოფხვრა პრაქტიკულად შეუძლებელია.
მიმდინარე სეზონში "საუთჰემპტონმა" 29 მატჩიდან 24 წააგო. გუნდი გახდა მეოთხე ინგლისურ ფეხბურთის ისტორიაში, რომელმაც ერთ სეზონში ზედიზედ ცხრა საშინაო მატჩი დათმო.
იურიჩის თქმით, გუნდი ბრძოლას ბოლომდე გააგრძელებს, თუმცა აღიარა, რომ "საუთჰემპტონი" ქულების მოსაპოვებლად მზად არ არის. მისი განცხადებით, ფეხბურთელებს თამაშის და მოგების სურვილი აქვთ, მაგრამ ხშირად საკმარისი კლასი არ ჰყოფნით.
"საუთჰემპტონის" ბედი შესაძლოა აპრილის დასაწყისში გადაწყდეს, თუ სხვა გუნდების შედეგები მათთვის არასახარბიელო იქნება.
რაც შეეხება "ვულვზს", მათი მდგომარეობა საგრძნობლად გაუმჯობესდა. თებერვლის დასაწყისში "არსენალთან" წაგების შემდეგ გუნდი გასავარდნ ზონაში იმყოფებოდა, თუმცა ბოლო ექვს მატჩში მოპოვებულმა 10 ქულამ მათ უსაფრთხო ზონაში გადაინაცვლა და ახლა "ვულვზი" გასავარდნ ზონას 9 ქულით უსწრებს.
"ვულვზის" მწვრთნელმა, ვიტორ პერეირამ, განაცხადა, რომ მის გუნდს მოდუნების უფლება არ აქვს და მომავალ მატჩებში მაქსიმალური კონცენტრაციით თამაშია საჭირო. მისი თქმით, გუნდმა საკუთარ თამაშზე უნდა გააკეთოს აქცენტი და არა მეტოქეების შედეგებზე.
"იფსვიჩს", რომელიც ასევე გასავარდნ ზონაში იმყოფება, "ნოტინგემ ფორესტთან" წაგების შემდეგ გადარჩენის მცირე შანსი აქვს დარჩენილი. გუნდს სეზონის ბოლოს რთული მატჩები ელის და პრემიერ ლიგაში ადგილის შენარჩუნება თითქმის შეუძლებელი ჩანს.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს