სირიაში ძალადობა გრძელდება: ალავიტების ოჯახების მასობრივი მკვლელობები

სირიაში, ყოფილი ლიდერის, ბაშარ ალ-ასადის ერთგულ რეგიონებში, ძალადობა და შურისძიების აქტები კვლავ გრძელდება. დროებითმა მთავრობამ ერთიანობისკენ მოუწოდა მოსახლეობას. გავრცელებული ინფორმაციით, ლატაკიისა და ტარტუსის სანაპირო პროვინციებიდან, რომლებიც ასადის მხარდამჭერ რეგიონებად ითვლება, ასობით ადამიანი იძულებული გახდა, საკუთარი სახლი დაეტოვებინა.

ადგილობრივი მოსახლეობა ყვება ძარცვისა და მასობრივი მკვლელობების შესახებ, რომელთა მსხვერპლი ბავშვებიც არიან. ქალაქ ბანიასის ალავიტებით დასახლებულ რაიონში, ჰაი ალ-კუსურში, ქუჩები სავსეა მიმოფანტული გვამებით, რომლებიც სისხლით არის დაფარული. თვითმხილველების თქმით, სხვადასხვა ასაკის მამაკაცები დახვრიტეს.

ალავიტები შიიტური ისლამის განშტოებას წარმოადგენენ და სირიის მოსახლეობის დაახლოებით 10%-ს შეადგენენ, მაშინ როდესაც ქვეყნის უმრავლესობა სუნიტი მუსლიმია. ასადი სწორედ ამ სექტას მიეკუთვნება.

ადგილობრივები შიშისგან ფანჯრებიდანაც კი ვერ იხედებოდნენ. ინტერნეტკავშირი არასტაბილურია, თუმცა, როდესაც კავშირი ჩნდება, ისინი მეზობლების გარდაცვალების შესახებ ინფორმაციას სოციალური ქსელებიდან იგებენ.

ერთ-ერთი ადგილობრივი მცხოვრები, აიმან ფარესი, ამბობს, რომ გადარჩენაში მისმა ბოლოდროინდელმა პატიმრობამ შეუწყო ხელი. 2023 წლის აგვისტოში მან სოციალურ ქსელში ვიდეო გამოაქვეყნა, სადაც ასადს კორუფციაში ადანაშაულებდა. მალევე დააკავეს და მხოლოდ გასული წლის დეკემბერში, ასადის რეჟიმის დაცემის შემდეგ, ისლამისტების მიერ პატიმრების გათავისუფლების შედეგად გაათავისუფლეს.

ჰაი ალ-კუსურის ქუჩებში შეჭრილმა მებრძოლებმა ის იცნეს, ამიტომ სიკვდილი აარიდეს, თუმცა ძარცვას ვერ გადაურჩა. მათ მისი მანქანები წაიღეს და სხვა სახლების ძარცვა განაგრძეს. ფარესის თქმით, თავდამსხმელები უცხოელები იყვნენ, სავარაუდოდ უზბეკები ან ჩეჩნები, თუმცა მათ შორის სირიელებიც იყვნენ, რომლებიც ოფიციალურ უსაფრთხოების ძალებს არ წარმოადგენდნენ. მკვლელობებში სამოქალაქო პირებიც მონაწილეობდნენ.

ფარესმა თქვა, რომ საკუთარ სახლებში მოკლული ოჯახები დაინახა, ქალები და ბავშვები სისხლში იყვნენ ამოსვრილები. ზოგიერთი ოჯახი სახურავებზე გაიქცა დასამალად, მაგრამ სისხლისღვრას ვერ გადაურჩა.

ადამიანის უფლებათა სირიის ობსერვატორიის მონაცემებით, ლატაკიის, ჯაბლესა და ბანიასის სანაპირო ქალაქებში 740-ზე მეტი მშვიდობიანი მოქალაქე დაიღუპა. შეტაკებების შედეგად ასევე დაიღუპა უსაფრთხოების ძალების 300-მდე წევრი და ასადის რეჟიმის ნარჩენები.

ბანიასის კიდევ ერთმა მცხოვრებმა, ალიმ, რომელმაც ვინაობის გამხელა არ ისურვა, ფარესის ინფორმაცია დაადასტურა. ალი, რომელიც მეუღლესთან და 14 წლის ქალიშვილთან ერთად კუსურში ცხოვრობდა, უსაფრთხოების ძალების დახმარებით გაიქცა სახლიდან.

ალიმ თქვა, რომ ოჯახები სუნიტებით დასახლებულ რაიონში მდებარე სკოლაში გადაიყვანეს, სადაც მათ დაიცავენ, სანამ ბანიასიდან მკვლელობებში მონაწილე დაჯგუფებების წევრებს არ გააძევებენ.

ძალადობა ხუთშაბათს დაიწყო, მას შემდეგ, რაც ასადის ერთგულმა ძალებმა, რომლებმაც იარაღის დაყრა არ ისურვეს, ლატაკიისა და ჯაბლეს სანაპირო ქალაქების მიმდებარე ტერიტორიაზე უსაფრთხოების ძალებს ჩასაფრება მოუწყვეს და ათობით ადამიანი მოკლეს.

ასადის არმიის ყოფილმა ბრიგადის გენერალმა, გიაზ დალამ, ამჟამინდელი მთავრობის წინააღმდეგ ახალი აჯანყების შესახებ განაცხადა.