სირიაში ძალადობის შედეგად მთელი ოჯახები დაიღუპნენ, აცხადებს გაერო

გაეროს ადამიანის უფლებათა ოფისის ინფორმაციით, სირიის სანაპირო რეგიონში ბოლო დროს განვითარებული ძალადობის შედეგად, მთელი ოჯახები, მათ შორის ქალები და ბავშვები, დაიღუპნენ. გაეროს წარმომადგენლის განცხადებით, მათ მიერ გადამოწმებული მონაცემებით, გასული ხუთშაბათიდან მოყოლებული, 111 მშვიდობიანი მოქალაქეა მოკლული, თუმცა რეალური რიცხვი, სავარაუდოდ, გაცილებით მაღალია.

ბევრი შემთხვევა იყო სასამართლოს გარეშე სიკვდილით დასჯა, რაც სექტანტური ნიშნით ხდებოდა და განსაკუთრებით ალავიტების დასახლებულ პუნქტებს ესხმოდნენ თავს. გავრცელებული ინფორმაციით, სუნიტური ისლამისტური მთავრობის მხარდამჭერი შეიარაღებული პირები შურისძიების მიზნით ახორციელებდნენ მკვლელობებს, რაც პრეზიდენტ ბაშარ ალ-ასადის მომხრეების მიერ უსაფრთხოების პატრულზე განხორციელებულ თავდასხმას მოჰყვა.

დამკვირვებელი ჯგუფების ცნობით, ლატაკიის, ტარტუსის, ჰამასა და ჰომსის პროვინციებში 1200-ზე მეტი მშვიდობიანი მოქალაქეა მოკლული, რომელთა უმეტესობა ალავიტია. გაერო მიესალმება სირიის დროებითი პრეზიდენტის, აჰმად ალ-შარაას დაპირებას, რომ შეიქმნება დამოუკიდებელი საგამოძიებო კომისია და პასუხისმგებლობა დაეკისრებათ დამნაშავეებს.

ეს ძალადობა სირიაში ყველაზე მასშტაბური იყო მას შემდეგ, რაც შარაამ დეკემბერში აჯანყებულთა შეტევა წამოიწყო და ასადის რეჟიმი დაამხო, რითაც დასრულდა 13-წლიანი სამოქალაქო ომი, რომელშიც 600 000-ზე მეტი ადამიანი დაიღუპა. სირიის ჩრდილო-დასავლეთი ხმელთაშუა ზღვის სანაპირო ალავიტების გულია, შიიტური ისლამის განშტოება, რომელსაც ასადის რეჟიმის პოლიტიკური და სამხედრო ელიტის უმეტესობა ეკუთვნოდა.

გასულ კვირას, უსაფრთხოების ძალებმა რეგიონში ოპერაცია დაიწყეს ასადის მომხრეების მიერ წამოწყებული აჯანყების საპასუხოდ. ძალადობა განსაკუთრებით გამწვავდა ხუთშაბათს, როდესაც სანაპირო ქალაქ ჯაბლეში შეიარაღებულმა პირებმა უსაფრთხოების 13 თანამშრომელი მოკლეს. საპასუხოდ, უსაფრთხოების ძალებმა რეგიონში გამაგრება გაგზავნეს, რომლებსაც მთავრობის მხარდამჭერი შეიარაღებული ჯგუფები და ცალკეული პირები შეუერთდნენ. მათ შტურმით აიღეს მრავალი ალავიტური ქალაქი და სოფელი, სადაც, ადგილობრივების თქმით, შურისძიების მიზნით ხოცავდნენ ხალხს და ძარცვავდნენ სახლებსა და მაღაზიებს.

გაეროს ადამიანის უფლებათა ოფისის წარმომადგენელმა, თამინ ალ-ხითანმა სამშაბათს განაცხადა, რომ ძალადობის მასშტაბების შესახებ ინფორმაცია კვლავ ვრცელდება. მისი თქმით, გაერომ, მკაცრი გადამოწმების მეთოდების გამოყენებით, ამ დროისთვის დაადასტურა 90 მამაკაცის, 18 ქალის, 2 გოგონასა და 1 ბიჭის მკვლელობა. წინასწარი ინფორმაციით, დამნაშავეები იყვნენ შეიარაღებული ჯგუფების წევრები, რომლებიც მხარს უჭერდნენ უსაფრთხოების ძალებს და ასადის რეჟიმთან დაკავშირებული ელემენტები.

მისი თქმით, არაერთ შემზარავ შემთხვევაში, მთელი ოჯახები, მათ შორის ქალები, ბავშვები და უმწეო პირები, დაიღუპნენ და განსაკუთრებით ალავიტების ქალაქები და სოფლები გახდნენ სამიზნე. მისივე თქმით, ოფისის მიერ შეგროვებული მრავალი ჩვენების მიხედვით, დამნაშავეები სახლებში შედიოდნენ და ეკითხებოდნენ მაცხოვრებლებს, იყვნენ თუ არა ალავიტები ან სუნიტები, რის შემდეგაც ან კლავდნენ, ან ინდობდნენ მათ. ზოგიერთმა გადარჩენილმა განაცხადა, რომ ბევრი მამაკაცი ოჯახების თვალწინ დახვრიტეს.

ასადის მომხრეები ასევე თავს დაესხნენ რამდენიმე საავადმყოფოს ლატაკიაში, ტარტუსსა და ბანიასში. მათ შეტაკება მოუვიდათ უსაფრთხოების ძალებთან, რის შედეგადაც ათობით მშვიდობიანი მოქალაქე დაშავდა, მათ შორის პაციენტები და ექიმები, ასევე დაზიანდა საავადმყოფოები.

სირიის ადამიანის უფლებათა ობსერვატორიის ცნობით, სამოქალაქო მსხვერპლის რიცხვი 1225-მდე გაიზარდა, მას შემდეგ, რაც სამშაბათს კიდევ 132 ადამიანის დაღუპვის შესახებ გახდა ცნობილი, მათ შორის 62 ბანიასში. მათი წყაროების ცნობით, ასევე დაიღუპა უსაფრთხოების 230 თანამშრომელი და ასადის მომხრე 250 მებრძოლი.

ალ-ხითანის თქმით, გაეროს ადამიანის უფლებათა უმაღლესმა კომისარმა სირიის ხელისუფლებას მოუწოდა, ჩაატაროს სწრაფი, საფუძვლიანი, დამოუკიდებელი და მიუკერძოებელი გამოძიება. მან ხაზგასმით აღნიშნა, რომ ყველა, ვინც პასუხისმგებელია დარღვევებზე, პასუხისგებაში უნდა მიეცეს, მათი კუთვნილების მიუხედავად, საერთაშორისო სამართლის ნორმებისა და სტანდარტების შესაბამისად. დაზარალებულებს და მათ ოჯახებს აქვთ სიმართლის, სამართლიანობისა და კომპენსაციის უფლება.