სირიელი ლტოლვილი გერმანიის ქალაქის მერი გახდა

გერმანიის სამხრეთ-დასავლეთ ნაწილში, ბადენ-ვიურტემბერგის მხარეში, ქალაქ ოსტელსჰაიმის მერად სირიელი წარმოშობის რაიან ალშებელი აირჩიეს. 2015 წელს გერმანიაში ლტოლვილის სტატუსით ჩასულმა ალშებელმა, კვირას გამართულ არჩევნებში ხმების 55.41% მოიპოვა და დაამარცხა ორი გერმანელი კანდიდატი.

29 წლის ალშებელი, რომელიც სირიის ქალაქ ას-სუვეიდადან რვა წლის წინ წამოვიდა, დამოუკიდებელ კანდიდატად იყრიდა კენჭს. გამარჯვების შემდეგ, ადგილობრივებმა სიხარულით შეხვდნენ ახალგაზრდა მერის არჩევას. ალშებელმა აღნიშნა, რომ ეს არის "სენსაციური" გამარჯვება და ოსტელსჰაიმმა მთელ გერმანიას აჩვენა შემწყნარებლობისა და კოსმოპოლიტიზმის მაგალითი, რაც კონსერვატიულ, სოფლის ტიპის რეგიონში თავისთავად ცხადი არ არის.

ალშებელის პირველი სატელეფონო ზარი გამარჯვების შემდეგ სირიაში მყოფ დედასთან განხორციელდა, რომელიც ამ ამბით აღფრთოვანებული იყო. ბადენ-ვიურტემბერგის მუნიციპალიტეტების ასოციაციის განცხადებით, ალშებელი არის პირველი სირიული წარმოშობის ადამიანი, რომელმაც მერის პოსტზე იყარა კენჭი და გაიმარჯვა. ის მოვალეობის შესრულებას ივნისში შეუდგება.

ოსტელსჰაიმის მაცხოვრებლები მოხარულები არიან ახალი მერის არჩევით. ერთ-ერთმა ადგილობრივმა მცხოვრებმა აღნიშნა, რომ "ზღაპარი ახდა და სწორი ადამიანი გახდა ჩვენი მერი". ალშებელის ერთ-ერთმა კონკურენტმა, მარკო შტრაუსმა, მას გამარჯვება მიულოცა და წარმატებები უსურვა.

ბადენ-ვიურტემბერგის ინტეგრაციის მინისტრმა განაცხადა, რომ ალშებელის გამარჯვება აჩვენებს, რომ მრავალფეროვნება ბადენ-ვიურტემბერგის განუყოფელი ნაწილია. მან იმედი გამოთქვა, რომ რაიან ალშებელის არჩევა მიგრაციული წარმომავლობის მქონე მეტ ადამიანს წაახალისებს, პოლიტიკურ თანამდებობებზე იყარონ კენჭი.

მიუხედავად ამისა, ყველას არ შეხვედრია 29 წლის ახალგაზრდა პოლიტიკოსი თბილად. საარჩევნო კამპანიის დროს, ალშებელმა სიძულვილის ენით სავსე კომენტარებიც მიიღო. ალშებელი კარდაკარ დადიოდა და თავის საარჩევნო პროგრამას აცნობდა მოსახლეობას. მიუხედავად იმისა, რომ გამოცდილება უმეტესად დადებითი იყო, ოსტელსჰაიმში იყვნენ მემარჯვენე რადიკალური ჯგუფების წარმომადგენლები, რომლებსაც მისი სირიული წარმომავლობის გამო მისი მიღება არ სურდათ.

სირიაში მასწავლებლისა და აგრონომის ოჯახში დაბადებული ალშებელი აღწერს, რომ 20 წლამდე უზრუნველად ცხოვრობდა. 2011 წელს სირიის მთავრობის წინააღმდეგ დაწყებული საპროტესტო აქციები მალევე ქაოსურ ომში გადაიზარდა. ბრძოლებმა და მოგვიანებით "ისლამური სახელმწიფოს" აღზევებამ 10.6 მილიონი ადამიანი აიძულა სახლი დაეტოვებინა 2015 წლის ბოლოსთვის - რაც სირიის ომამდელი მოსახლეობის დაახლოებით ნახევარია. ალშებელის თქმით, ის სამხედრო სამსახურში გაწვევის ან ქვეყნის დატოვების დილემის წინაშე იდგა.

ბევრი სირიელი იძულებით გადაადგილდა ქვეყნის შიგნით ან გაიქცა რეგიონის ქვეყნებში, ზოგიერთმა კი, ალშებელის მსგავსად, სახიფათო გზა ევროპისკენ აირჩია. ის 21 წლის იყო, როდესაც თურქეთიდან საბერძნეთის კუნძულ ლესბოსზე რეზინის ნავით გადავიდა. გერმანიის ყოფილმა კანცლერმა ანგელა მერკელმა 2015 წელს განახორციელა ხანმოკლე ღია კარის პოლიტიკა, რომლის ფარგლებშიც ქვეყანამ მომდევნო წლებში დაახლოებით 1.2 მილიონი თავშესაფრის მაძიებელი მიიღო, მათ შორის ალშებელიც. ამ ნაბიჯმა გერმანიაში უკურეაქცია გამოიწვია და 2015 წლის ზაფხულის შემდეგ ანტი-იმიგრაციული პარტია "ალტერნატივა გერმანიისთვის" (AfD) გააძლიერა. გერმანიაში ჩასვლის შემდეგ, ალშებელი ოსტელსჰაიმთან ახლოს ცხოვრობდა და ამბობდა, რომ "ერთადერთი რაც შეგიძლია გააკეთო, სწრაფად ფეხზე დადგომაა".