ტორონტოში, პაბში სროლის შედეგად, სულ მცირე, 12 ადამიანი დაშავდა

კანადის ქალაქ ტორონტოში, ერთ-ერთ პაბში სროლა მოხდა, რის შედეგადაც, წინასწარი მონაცემებით, სულ მცირე, თორმეტი ადამიანი დაშავდა. სამართალდამცავები ამჟამად ეძებენ თავდამსხმელს. ინციდენტი ადგილობრივი დროით პარასკევს, 22:39 საათზე, ტორონტოს აღმოსავლეთ ნაწილში, სკარბოროს ცენტრთან ახლოს მოხდა. პოლიციას ჯერჯერობით არ გაუსაჯაროებია დაშავებულთა მდგომარეობის შესახებ დეტალური ინფორმაცია, თუმცა ცნობილია, რომ ოთხ მათგანს სიცოცხლისთვის საშიში დაზიანებები არ მიუღია. თვითმხილველების თქმით, თავდამსხმელი, რომელსაც შავი ბალაკლავა ეკეთა, შემთხვევის ადგილიდან ვერცხლისფერი ავტომობილით მიიმალა. ტორონტოს მერმა, ოლივია ჩოუმ, სოციალურ ქსელში გამოთქვა შეშფოთება მომხდარის გამო და განაცხადა, რომ პოლიციის უფროსმა დაარწმუნა, რომ ყველა საჭირო რესურსი მობილიზებულია. გამოძიება ამჟამად საწყის ეტაპზეა და პოლიცია დამატებით ინფორმაციას მოგვიანებით გაავრცელებს. მერის თქმით, მისი ფიქრები დაშავებულებთან და მათ ოჯახებთანაა.