ცნობილი ჟოკეი ფრანკო დეტორი გაკოტრდა

ბრიტანული დოღის ვეტერანმა, ფრანკო დეტორიმ, განაცხადა, რომ თავს უხერხულად გრძნობს მას შემდეგ, რაც გაკოტრების შესახებ განაცხადი შეიტანა. მიზეზი საგადასახადო სამსახურთან ხანგრძლივი დავის მოგვარების შეუძლებლობა გახდა. 54 წლის იტალიელი, რომელიც 37 წლის განმავლობაში ბრიტანული და ევროპული დოღის სცენის ერთ-ერთი მთავარი ფიგურა იყო, კარიერის განმავლობაში 3300-ზე მეტჯერ გახდა გამარჯვებული.

დეტორის ფინანსური მდგომარეობა გასული წლის დეკემბერში გახდა საჯარო, როდესაც სასამართლომ უარყო მისი თხოვნა ანონიმურობის შესახებ. საქმე დეტორის წინააღმდეგ მას შემდეგ აღიძრა, რაც მან პროფესიონალი საგადასახადო მრჩევლები დაიქირავა, რათა მის და მისი ოჯახის ფინანსურ საქმეებს ზედამხედველობა გაეწიათ. 2001 წელს ბრიტანეთის იმპერიის ორდენის კავალერი დეტორიმ, გასულ წელს გაწყვიტა ურთიერთობა აღნიშნულ მრჩევლებთან და საქმის მოგვარების მიზნით სხვა ფინანსური ექსპერტების მომსახურებით ისარგებლა.

დეტორის განცხადებით, ბოლო ექვსი თვის განმავლობაში მისი მრჩევლები საგადასახადო სამსახურთან თანამშრომლობდნენ, რათა მისი ფინანსური მდგომარეობისთვის გამოსავალი ეპოვათ. მან ასევე აღნიშნა, რომ დამწუხრებულია და უხერხულად გრძნობს თავს ამ შედეგის გამო და სხვებს ურჩევს, უფრო მეტი კონტროლი ჰქონდეთ საკუთარ ფინანსურ საკითხებზე. გაკოტრება სერიოზული გადაწყვეტილებაა და მისი შედეგები მას მრავალი წლის განმავლობაში შეეხება.

არსებული შეფასებით, დეტორის შემოსავალი მხოლოდ დოღიდან 15-დან 20 მილიონ ფუნტ სტერლინგამდეა. მან სახელი გაითქვა დოღის გარეთაც, მონაწილეობდა სხვადასხვა სატელევიზიო შოუში და გახსნა იტალიური რესტორნების ქსელი. უცნობია, თუ რა თანხა ემართა მილანში დაბადებულ დეტორის, რომელმაც 287 პირველი ჯგუფის გამარჯვება მოიპოვა და 1996 წლის სექტემბერში ასკოტში გამართულ ერთ შეხვედრაში ყველა შვიდივე რბოლა მოიგო.

საგადასახადო სამსახურის წარმომადგენლის განცხადებით, ისინი მხარს უჭერენ გადასახადების გადამხდელებს, რომლებსაც საგადასახადო დავალიანება აქვთ და ყველაფერს აკეთებენ იმისათვის, რომ დაეხმარონ მათ ვალის გასტუმრებაში, მაგალითად, სთავაზობენ გადახდის გეგმებს. დეტორიმ 2023 წელს შეწყვიტა ბრიტანეთში ასპარეზობა, თუმცა კარიერას ამერიკის შეერთებულ შტატებში აგრძელებს და იმედოვნებს, რომ ახლა შეძლებს თავის ძირითად საქმიანობაზე კონცენტრირებას. ის ამბობს, რომ შვება იგრძნო, რომ ამ ხანგრძლივ საკითხს წერტილი დაესვა, რაც საშუალებას მისცემს, გადატვირთულიყო და საერთაშორისო კარიერაზე გაამახვილოს ყურადღება.