უელსი რემზის ტრავმის გამო შეშფოთებულია

უელსის ნაკრები, სავარაუდოდ, მსოფლიო ჩემპიონატის საკვალიფიკაციო ეტაპს კაპიტან აარონ რემზის გარეშე დაიწყებს. ფეხბურთელმა კვლავ კუნთის ტრავმა მიიღო. რემზი, რომელმაც თებერვალში ხუთთვიანი პაუზის შემდეგ განაახლა თამაში, სამშაბათს, "კარდიფ სიტის" მიერ "ლუტონ თაუნთან" 2-1 წაგებისას შეცვალეს. 34 წლის ფეხბურთელი მარტის თვეში ყაზახეთისა და ჩრდილოეთ მაკედონიის წინააღმდეგ დაგეგმილ მატჩებში უელსის ნაკრებში უნდა ყოფილიყო, თუმცა მთავარი მწვრთნელი, კრეიგ ბელამი, ნაკრების შემადგენლობაში, დიდი ალბათობით, რემზის არ შეიყვანს. "არსენალისა" და "იუვენტუსის" ყოფილი ნახევარმცველი ტრავმის მიღების შემდეგ აშკარად დამწუხრებული ჩანდა. "კარდიფის" მწვრთნელის, ომერ რიზას თქმით, ტრავმის სიმძიმე ჯერჯერობით უცნობია და შეფასება მოხდება. რემზი 2023 წლის ზაფხულში "კარდიფში" დაბრუნების შემდეგ ხშირად იტანჯება ტრავმებით. მისი კონტრაქტი ამ სეზონის ბოლოს იწურება და მიუხედავად იმისა, რომ უელსის დედაქალაქში დარჩენის სურვილი გამოთქვა, ეს უკანასკნელი დაზიანება სერიოზულად შეზღუდავს მის მონაწილეობას მიმდინარე სეზონის დარჩენილ ნაწილში, როდესაც "ლურჯი ფრინველები" ჩემპიონშიფიდან გავარდნის თავიდან აცილებას ცდილობენ. უელსი 2026 წლის მსოფლიო ჩემპიონატის საკვალიფიკაციო ეტაპს 22 მარტს, შაბათს, ყაზახეთის წინააღმდეგ საშინაო მატჩით დაიწყებს, რასაც სამი დღის შემდეგ ჩრდილოეთ მაკედონიაში გამგზავრება მოჰყვება.