უელსის ნაკრები შოტლანდიის წინააღმდეგ შეუცვლელი შემადგენლობით ითამაშებს

უელსის მორაგბეთა ნაკრები შოტლანდიის წინააღმდეგ გასამართ მატჩში მოედანზე იგივე შემადგენლობით გამოვა, რომელმაც ირლანდიასთან ითამაშა. მთავარმა მწვრთნელმა, მეტ შერატმა, სასტარტო შემადგენლობაში ცვლილება არ შეიტანა. ამასთან, სათადარიგოთა სკამზე დავი ლეიკი და კეირონ ასირატი დაბრუნდნენ.

დავი ლეიკი, რომელიც 2024 წლის ზაფხულის ტურნესა და საშემოდგომო ტესტ-მატჩებში უელსის ნაკრების კაპიტანი იყო, ბიცეფსის ტრავმის მოშუშების შემდეგ გუნდს დაუბრუნდა. ის სათადარიგოთა სკამზე ევან ლოიდს შეცვლის, ხოლო ძირითად შემადგენლობაში ჰუკერის პოზიციაზე ელიოტ დი ითამაშებს. პირველ ხაზზე ასირატი ჰენრი თომასს ამჯობინეს.

შერატმა ნდობა გამოუცხადა გუნდს, რომელმაც ირლანდიასთან მატჩში პროგრესის იმედისმომცემი ნიშნები აჩვენა. თუკი მოულოდნელი ცვლილებები არ მოხდება, ეს იქნება პირველი შემთხვევა 2019 წლის მსოფლიო ჩემპიონატის შემდეგ, როდესაც უელსი მოედანზე შეუცვლელი სასტარტო შემადგენლობით გამოვა. მაშინ უელსმა საქართველო და ავსტრალია დაამარცხა.

შერატის თქმით, ირლანდიასთან მატჩში მოთამაშეებმა კარგი თამაში აჩვენეს და მას სურს, რომ მათ კიდევ ერთხელ მიეცეთ შანსი. მისივე განცხადებით, ლეიკის დაბრუნება გუნდისთვის მნიშვნელოვანია, რადგან ის გამოცდილი მოთამაშეა და გუნდს თამაშის დასრულებაში დაეხმარება.

ელიოტ დის პირველ ხაზში ნიკი სმიტი და ვილგრიფ ჯონი შეუერთდებიან. ვილ როულენდსი მეორე ხაზში დაფიდ ჯენკინსთან ერთად ითამაშებს. ჯენკინსი და ტომი რეფელი ერთადერთი მოთამაშეები არიან, რომლებიც შარშან შოტლანდიასთან წაგებულ მატჩში (27-26) სასტარტო შემადგენლობაში იყვნენ.

რეფელი ფლანკერის პოზიციაზე ითამაშებს, ხოლო აარონ ვეინრაიტი სათადარიგოთა სკამზე იქნება. მას უკანა ხაზში კაპიტანი ჯეკ მორგანი და ტაულუპე ფალეტაუ შეუერთდებიან. გარეთ ანსკომბი, რომელმაც ირლანდიასთან მატჩში ტვინის შერყევა მიიღო, გამოჯანმრთელდა და ტომოს უილიამსთან ერთად ნახევარდაცვაში ითამაშებს. ცენტრში მაქს ლეველინი და ბენ თომასი იქნებიან.

ჯოშ ადამსი კუნთის ტრავმის გამო ვერ ითამაშებს, ამიტომ "სკარლეტსის" ტრიოს - ელის მიის, ბლერ მიურეისა და ტომ როჯერსს კიდევ ერთი შანსი ეძლევათ, რომ საკუთარი შესაძლებლობები წარმოაჩინონ.

უელსი "ექვსი ერის" გათამაშების ცხრილში ბოლო ადგილზეა და სამივე მატჩი წაგებული აქვს, ხოლო შოტლანდია მეოთხე ადგილზეა იტალიასთან მოგების შემდეგ. შერატის თქმით, გუნდი ცდილობს, რომ მუდმივად გაუმჯობესდეს და შეინარჩუნოს ის შემართება და გამბედაობა, რაც ირლანდიასთან მატჩში გამოავლინა.