"უორიორზის" გარემარბს, ჯოშ ლინჩს, დოპინგ-ტესტის გამო 16-თვიანი დისკვალიფიკაცია შეეფარდა

"უორიორზ ვულვზის" ახალგაზრდა გარემარბს, ჯოშ ლინჩს, აკრძალული ნივთიერების გამოყენების გამო სპორტული საქმიანობა 16 თვით შეუჩერდა. 21 წლის სპორტსმენს დოპინგ-ტესტი 2023 წლის დეკემბერში, ვარჯიშის დროს ჩაუტარდა, რომლის შედეგადაც მის სინჯში ზრდის ჰორმონი, იბუტამორენი აღმოჩნდა, რაც სპორტში აკრძალულია. ლინჩი მოედნიდან 2024 წლის თებერვლიდან მოყოლებული მოხსნილი იყო, მას შემდეგ, რაც მას დროებითი დისკვალიფიკაცია დაეკისრა. მის დისკვალიფიკაციაში ჩაითვლება ის პერიოდი, რომელიც მან მოედანს მიღმა გაატარა, რაც იმას ნიშნავს, რომ ის გუნდში დაბრუნებას ივნისიდან შეძლებს. დროებითი დისკვალიფიკაციის შემდეგ, ლინჩმა აღიარა ანტიდოპინგური წესების დარღვევა, თუმცა გაასაჩივრა სანქცია და განაცხადა, რომ იბუტამორენი შეგნებულად არ გამოუყენებია. ლინჩის თქმით, აკრძალული ნივთიერება შემთხვევით მოხვდა მის ორგანიზმში, როდესაც მისმა მეგობარმა პროტეინის კოქტეილი მოუმზადა, რომლის შემადგენლობაშიც იბუტამორენი აღმოჩნდა. მან ასევე აღნიშნა, რომ მისმა მეგობარმა მანამდე იმავე ბლენდერით მოამზადა პროტეინის კოქტეილი, რომელიც იბუტამორენს შეიცავდა. სპეციალისტების მიერ ლინჩის ახსნა დამაჯერებლად იქნა მიჩნეული, რადგან ნივთიერების რეგულარული გამოყენების შემთხვევაში, ის 2024 წლის იანვარში აღებულ სხვა სინჯშიც გამოვლინდებოდა. საკითხი დამოუკიდებელ ანტიდოპინგურ პანელზე გადავიდა, სადაც 2024 წლის დეკემბერში მოსმენა გაიმართა. მოსმენაზე ლინჩმა და მისმა მეგობარმა ჩვენება მისცეს და მათ უკად-ის წარმომადგენლებმა ჯვარედინი დაკითხვა ჩაუტარეს. იანვარში გამოქვეყნებულ გადაწყვეტილებაში, პანელმა ლინჩის ახსნა მიიღო და დაადგინა, რომ მას განზრახვა არ ჰქონია, რის გამოც მას 16-თვიანი დისკვალიფიკაცია შეეფარდა.