Apple-მა ახალი iPad Air წარადგინა

კომპანია Apple-მა დღევანდელ ვირტუალურ ღონისძიებაზე „Time Flies“ ახალი iPad Air წარადგინა. მოწყობილობას 10.9 დიუმიანი Liquid Retina ტიპის ეკრანი აქვს (2360 x 1640 პიქსელი), Touch ID-ის თითის ანაბეჭდის სკანერი კი ჩაშენებულია ჩართვის ღილაკში. iPad Air-ის წარმადობას უზრუნველყოფს ახალი 5 ნანომეტრიანი A14 Bionic პროცესორი. ექვსბირთვიანი ცენტრალური პროცესორის (CPU) გამოყენებით, Apple აცხადებს, რომ ახალი iPad Air 40%-ით უფრო სწრაფია, ვიდრე მისი წინამორბედი მოდელი. გაუმჯობესებულია გრაფიკული პროცესორიც, რაც მნიშვნელოვნად აისახება მოწყობილობის გრაფიკულ შესაძლებლობებზე. iPad Air-ის ახალ მოდელს გააჩნია 12 მეგაპიქსელიანი ძირითადი კამერა და ვიდეოსტაბილიზაციის გაუმჯობესებული ფუნქცია, ხოლო FaceTime HD კამერა 7 მეგაპიქსელს შეადგენს. უახლესი iPad Air თავსებადია Apple Pencil-ის მეორე თაობასთან, რომელიც მაგნიტურად მაგრდება პლანშეტზე. მოწყობილობა ასევე თავსებადია Apple-ის Magic Keyboard-თან, რომლის ფასი 299 დოლარია. iPad Air-ის გაყიდვა მომდევნო თვიდან დაიწყება და ხელმისაწვდომი იქნება ნაცრისფერ, ოქროსფერ, მწვანე და ცისფერ ფერებში, საწყისი ფასი 599 დოლარიდან.