ავსტრალიაში თვითმფრინავის ბორტზე შეიარაღებული მოზარდი მგზავრებმა გააუვნებელყვეს

ავსტრალიის პოლიციამ 17 წლის მოზარდს ბრალი წაუყენა, რომელმაც თვითმფრინავში თოფი და საბრძოლო მასალა შეიტანა. ინციდენტი მელბურნის მახლობლად, ავალონის აეროპორტში მოხდა. თვითმფრინავი, რომელსაც 160 მგზავრი სიდნეის მიმართულებით უნდა გაეყვანა, აფრენისთვის ემზადებოდა.

პოლიციის ვარაუდით, მოზარდი აეროპორტის ტერიტორიაზე უსაფრთხოების ღობის დარღვევით შევიდა, შემდეგ კი თვითმფრინავის კიბეზე ავიდა, სადაც მგზავრებმა ის შეაჩერეს და გააუვნებელყვეს.

დაკავებულს, რომლის ვინაობაც არ სახელდება, არასრულწლოვანთა სასამართლოში წარადგენენ რვა ბრალდებით. ბრალდებებს შორის არის თვითმფრინავის უკანონო ხელში ჩაგდების მცდელობა, ფრენის უსაფრთხოებისთვის საფრთხის შექმნა და ცრუ შეტყობინება ბომბის შესახებ.

ვიქტორიის პოლიციის განცხადებით, შემთხვევის ადგილზე ბომბების განაღმვის სპეციალისტების გამოძახება გახდა საჭირო, რათა ახლომახლო მდებარე ავტომობილი და ორი ჩანთა შეემოწმებინათ.

ადგილობრივი მედიის მიერ გავრცელებულ ვიდეოში ჩანს, თუ როგორ აკავებს ერთ-ერთი მგზავრი ეჭვმიტანილს, ხოლო აეროპორტის თანამშრომელი და პილოტი მოზარდის ქამრიდან იარაღებს იღებენ. პილოტი ასევე ცდილობს თოფი მოზარდს მოაშოროს.

პოლიციის განცხადებით, მოზარდი, რომელიც ბალარატის რაიონიდან არის, ამჟამად პატიმრობაში იმყოფება.

პოლიციის წარმომადგენლის განცხადებით, მგზავრებმა შეამჩნიეს, რომ მოზარდს იარაღი ჰქონდა, როდესაც ის თვითმფრინავის კიბეზე ადიოდა. მისივე თქმით, მოზარდის გაუვნებელყოფაში სულ მცირე სამი მგზავრი მონაწილეობდა.

პოლიცია ამჟამად კონტრტერორისტულ სამსახურებთან თანამშრომლობს, თუმცა მოტივის დადგენა ჯერ ნაადრევია. პოლიციის წარმომადგენელმა მგზავრების სიმამაცე აღნიშნა და დასძინა, რომ ეს მათთვის ნამდვილად შემზარავი გამოცდილება იქნებოდა.

ერთ-ერთი მგზავრის თქმით, მოზარდი აეროპორტის თანამშრომლის ფორმაში იყო გამოწყობილი და აღელვებული ჩანდა. მისი თქმით, მან მხოლოდ იარაღის მოშორება და მოზარდის დაკავება მოახერხა, სანამ პოლიცია მოვიდოდა.

პოლიციის ინფორმაციით, ინციდენტის შედეგად არავინ დაშავებულა. გამომძიებლებმა ეჭვმიტანილის ავტომობილი და ორი ჩანთა იქვე ახლოს აღმოაჩინეს.

ავალონის აეროპორტს მხოლოდ Jetstar ემსახურება, რომელიც Qantas-ის ბიუჯეტური ავიაკომპანიაა. ავიაკომპანიის განცხადებით, ისინი მომხდართან დაკავშირებით გამოძიებასთან თანამშრომლობენ და მადლობას უხდიან მგზავრებს, რომლებმაც ეკიპაჟს სიტუაციის უსაფრთხოდ მოგვარებაში დაეხმარნენ. ავალონის აეროპორტის ხელმძღვანელის განცხადებით, აეროპორტი მუშაობას დაუბრუნდა.