ჩრდილოეთ მაკედონიის ქალაქ კოჩანში ათასობით ადამიანი გამოვიდა საპროტესტო აქციაზე, რომელიც ღამის კლუბში გაჩენილ ხანძარს მოჰყვა. ხანძრის შედეგად 59 ადამიანი დაიღუპა, მათ შორის ბევრი მოზარდი. დემონსტრანტები სამართლიანობას და კორუფციის წინააღმდეგ ქმედით ნაბიჯებს ითხოვენ.
ადგილობრივების განცხადებით, კლუბი, სადაც პოპულარული ჰიპ-ჰოპ ჯგუფის კონცერტი იმართებოდა, გადატვირთული იყო. ხანძარი სავარაუდოდ პიროტექნიკის გამოყენების შედეგად გაჩნდა, რამაც ჭერის აალება გამოიწვია.
ტრაგედიის გამო, დაკითხვაზე 20-მდე ადამიანია გადაყვანილი, მათ შორის კლუბის მფლობელი და ყოფილი სამთავრობო მოხელეები. კოჩანში ბევრი თვლის, რომ კორუფციის გამო, აღნიშნული დაწესებულება უსაფრთხოების ნორმების დარღვევით ფუნქციონირებდა.
დაკარგულთა ოჯახის წევრები საავადმყოფოსთან დნმ-ის ნიმუშებს ტოვებენ, რათა დაღუპულთა იდენტიფიცირება მოხდეს. კოჩანი, 25,000-მდე მოსახლის მქონე ქალაქი, დედაქალაქ სკოპიედან აღმოსავლეთით 100 კილომეტრში მდებარეობს.
ხანძრის შედეგად 160-ზე მეტი ადამიანი დაშავდა, მათ შორის 45-ის მდგომარეობა მძიმეა. დაშავებულთა ნაწილი სპეციალიზებული მკურნალობისთვის მეზობელ ბულგარეთში, საბერძნეთში, სერბეთსა და თურქეთში გადაიყვანეს.
საპროტესტო აქციაზე ერთ-ერთი დაღუპულის ბიძამ განაცხადა, რომ მსგავსი ტრაგედია აღარ უნდა განმეორდეს. შეკრებილები დუმილით იდგნენ, შემდეგ კი შეძახილებით სამართლიანობის მოთხოვნა დაიწყეს.
მგლოვიარეები სანთლებს ანთებდნენ, ერთმანეთს ეხვეოდნენ და ცრემლებს ვერ იკავებდნენ. ქალაქის ცენტრალურ მოედანზე სამძიმრის წერილებს ტოვებდნენ. მოზარდების ჯგუფმა ერთ-ერთ ბარს შეუტია, ფანჯრები ჩაამსხვრია და დაარბია, რადგან ფიქრობდნენ, რომ ის კლუბის მფლობელს ეკუთვნოდა.
ხანძარი კვირას, ადგილობრივი დროით 02:30 საათზე დაიწყო და სწრაფად გავრცელდა, რადგან ჭერი აალებადი მასალისგან იყო დამზადებული. შინაგან საქმეთა მინისტრის განცხადებით, არსებობს საფუძველი ვივარაუდოთ, რომ ხანძარს კორუფცია უკავშირდება.
იმ დროს კლუბში 500-მდე ადამიანი იმყოფებოდა, რაც გაყიდული 250 ბილეთის რაოდენობას მნიშვნელოვნად აღემატებოდა. ოფიციალური პირების განცხადებით, კლუბის ლიცენზია უკანონოდ იყო მოპოვებული, ხოლო შენობა გადაკეთებული ხალიჩების საწყობი იყო, რომლის ერთადერთი საავარიო გასასვლელიც დაკეტილი აღმოჩნდა. შენობაში მხოლოდ ორი ცეცხლმაქრი იყო და არც ხანძრის სიგნალიზაცია ფუნქციონირებდა.
ჩრდილოეთ მაკედონიის ერთ-ერთი სამოქალაქო ჯგუფი მოუწოდებს მოქალაქეებს, სამშაბათს ქვეყნის მასშტაბით ქალაქების ცენტრებში შეიკრიბონ.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს