ისრაელის თავდაცვის ძალები იუწყებიან, რომ ღაზის სექტორზე ფართომასშტაბიანი საჰაერო იერიშები მიმდინარეობს. ადგილობრივი საგანგებო სიტუაციების სამსახურის წარმომადგენლის განცხადებით, სულ მცირე 34 პალესტინელი დაიღუპა და 70-ზე მეტი დაშავდა. ისრაელის არმიის განცხადებით, მათი სამიზნე ჰამასის კუთვნილი "ტერორისტული ობიექტებია". ეს არის ღაზის სექტორზე განხორციელებული ყველაზე მასშტაბური საჰაერო თავდასხმა 19 იანვრის ცეცხლის შეწყვეტის შეთანხმების შემდეგ. ცეცხლის შეწყვეტის შეთანხმების გახანგრძლივების შესახებ მოლაპარაკებები წარუმატებლად დასრულდა.
მედიკოსებისა და თვითმხილველების თქმით, დარტყმები განხორციელდა დეირ ალ-ბალაში, ღაზის ცენტრში, ღაზის ქალაქში, ასევე ხან იუნისსა და რაფაჰში მდებარე ობიექტებზე. ისრაელის პრემიერ-მინისტრის ბენიამინ ნეთანიაჰუსა და თავდაცვის მინისტრის ისრაელ კაცის ბრძანებით, იერიშები სამშაბათს დილით დაიწყო. პრემიერ-მინისტრის აპარატის განცხადებით, ეს გადაწყვეტილება ჰამასის მიერ მძევლების გათავისუფლებაზე არაერთგზის უარის თქმას და აშშ-ის პრეზიდენტის სპეციალური წარმომადგენლის სტივ ვიტკოფისა და შუამავლების მიერ შეთავაზებული ყველა წინადადების უარყოფას მოჰყვა. ისრაელი ამიერიდან ჰამასის წინააღმდეგ სამხედრო ძალის გაზრდით იმოქმედებს.
თავდასხმის გეგმა ისრაელის თავდაცვის ძალებმა შაბათ-კვირას წარადგინეს და პოლიტიკურმა ხელმძღვანელობამ დაამტკიცა. თეთრი სახლის წარმომადგენლის განცხადებით, ისრაელმა იერიშების განხორციელებამდე კონსულტაციები აშშ-ის პრეზიდენტის დონალდ ტრამპის ადმინისტრაციასთან გაიარა. მოლაპარაკებები დროებითი ზავის პირველი ფაზის 1 მარტს დასრულების შემდეგ მიმდინარეობდა. აშშ-მა პირველი ფაზის აპრილის შუა რიცხვებამდე გახანგრძლივება, მათ შორის ჰამასის მიერ დაკავებული მძევლებისა და ისრაელის მიერ დაკავებული პალესტინელი პატიმრების გაცვლა შესთავაზა. თუმცა, მოლაპარაკებებთან დაკავშირებულმა პალესტინელმა ოფიციალურმა პირმა განაცხადა, რომ ისრაელი და ჰამასი ვიტკოფის მიერ არაპირდაპირი მოლაპარაკებების დროს წარმოდგენილი შეთანხმების საკვანძო ასპექტებზე ვერ შეთანხმდნენ.
ისრაელსა და ჰამასს შორის ბოლო ომი 2023 წლის 7 ოქტომბერს დაიწყო, როდესაც ჰამასმა ისრაელის სამხრეთში 1200-ზე მეტი ადამიანი მოკლა, ძირითადად მშვიდობიანი მოქალაქეები, ხოლო 251 მძევლად აიყვანა. ამ თავდასხმამ ისრაელის სამხედრო ოპერაცია გამოიწვია, რომელსაც, ჰამასის მიერ კონტროლირებადი ჯანდაცვის სამინისტროს მონაცემებით, 48 520-ზე მეტი ადამიანის სიცოცხლე ემსხვერპლა, რომელ მონაცემებსაც გაერო და სხვა ორგანიზაციები იყენებენ. ღაზის 2.1 მილიონი მოსახლეობის უმეტესობა არაერთხელ იქნა იძულებით გადაადგილებული. დაზიანებულია ან განადგურებულია შენობების დაახლოებით 70%, ჯანდაცვის, წყალმომარაგებისა და სანიტარიის სისტემები მოშლილია და საკვების, საწვავის, მედიკამენტებისა და თავშესაფრის დეფიციტია.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს