უკვე მეორე კვირაა, დომინიკელთა რესპუბლიკაში მიმდინარეობს პიტსბურგის უნივერსიტეტის სტუდენტის, 20 წლის სუდიქშა კონანკის ძებნა, რომელიც საგაზაფხულო არდადეგებზე ყოფნისას გაუჩინარდა.
სუდიქშა კონანკი ბოლოს 6 მარტს, ადგილობრივი დროით დაახლოებით 04:00 საათზე, ერთ-ერთ სასტუმროში ნახეს. მისი გაუჩინარების საქმეზე გამოძიება დაკარგული პირის სტატუსით მიმდინარეობს. სამართალდამცავები განიხილავენ ვერსიას, რომ ქალბატონი კონანკი შესაძლოა დაიხრჩო. ამასთან, დომინიკელთა რესპუბლიკის გენერალური პროკურორი არ გამორიცხავს ძალადობრივ დანაშაულსაც.
ცნობილია, რომ სუდიქშა კონანკი პიტსბურგის უნივერსიტეტის ბიოლოგიისა და ქიმიის ფაკულტეტის სტუდენტია. ის ხუთ მეგობარ ქალთან ერთად პუნტა კანაში, ერთ-ერთ კურორტზე იმყოფებოდა. კონანკი ინდოეთის მოქალაქეა და ამერიკის შეერთებული შტატების მუდმივი რეზიდენტი. ის ოჯახთან ერთად ვირჯინიის შტატში, შანტილიში ცხოვრობს.
სათვალთვალო კამერებმა დააფიქსირეს, რომ ის და მისი მეგობრები სანაპიროსკენ მიემართებოდნენ. ვიდეოში ჩანს ხუთი ქალი და ორი ამერიკელი მამაკაცი. პოლიციის ინფორმაციით, სუდიქშა კონანკი სანაპიროზე ერთ-ერთ მამაკაცთან ერთად დარჩა, დანარჩენები კი სასტუმროში დაბრუნდნენ.
დომინიკელთა რესპუბლიკის პრეზიდენტმა, ლუის აბინადარმა განაცხადა, რომ ბოლო პირმა, რომელსაც კონანკისთან კონტაქტი ჰქონდა, განაცხადა, რომ სანაპიროზე ყოფნისას მათ ტალღა დაარტყა. მამაკაცის, ჯოშუა რიიბის მშობლებმა, რომელიც ბოლოს კონანკისთან ერთად ნახეს, განცხადება გაავრცელეს და იმედი გამოთქვეს, რომ კონანკის რაც შეიძლება მალე იპოვიან. რიიბი მინესოტას შტატში, სენტ კლაუდის სახელმწიფო უნივერსიტეტის სტუდენტია.
სამართალდამცავები აცხადებენ, რომ სუდიქშა კონანკის ძებნაში ათობით საათი დაიხარჯა. დომინიკის პოლიცია საძიებო ტერიტორიებს ყოფს და გარკვეულ სექტორებს დრონებს ანაწილებს. პილოტები აკვირდებიან კადრებს, რომლებიც საკონტროლო ცენტრში იტვირთება, სადაც ხელოვნური ინტელექტი ოკეანეში ობიექტების იდენტიფიცირებას ცდილობს. სამძებრო ჯგუფები ძებნას წყალშიც და ხმელეთზეც აწარმოებენ.
ხელისუფლება აცხადებს, რომ ჯერჯერობით უცნობია, იყო თუ არა რაიმე ძალადობა კონანკის გაუჩინარებაში. სანაპიროზე სისხლი ან ძალადობის ნიშნები არ აღმოჩენილა.
პიტსბურგის უნივერსიტეტმა, სადაც კონანკი სწავლობს, განცხადება გაავრცელა, რომ მისი გაუჩინარების საპასუხოდ, ისინი თანამშრომლობენ ფედერალურ საგამოძიებო ბიუროსთან, ნარკოტიკების კონტროლის ადმინისტრაციასთან, სამშობლოს უსაფრთხოების დეპარტამენტთან და ადგილობრივ ხელისუფლებასთან.
ინტერპოლმა კონანკის გაუჩინარების შემდეგ გლობალური განგაში გამოაცხადა. ყვითელი შეტყობინება განკუთვნილია დაკარგული პირებისთვის, როგორიცაა გატაცების მსხვერპლი ან "აუხსნელი გაუჩინარებები".
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს